برطانوی ہوم آفس نے ایک بیان میں کہا ہے کہ ’برطانیہ نے سعودی عرب اور بحرین کے شہریوں کو الیکٹرانک ویزے سے استثنی کا درجہ دے دیا ہے‘۔

عرب نیوز کے مطابق یہ درجہ یکم جون سے نافذ العمل ہو گا اور اس نئی ترمیم کے تحت سعودی عرب اور بحرین کے تمام شہری الیکٹرانک ویزے سے استثنی کے ساتھ چھ ماہ تک برطانیہ جانے کے لیے درخواست دے سکتے ہیں۔

سعودی عرب اور بحرین کے شہری اب ویزا حاصل کیے بغیر برطانیہ کا سفر کر سکتے ہیں بشرطیکہ وہ ہر بار برطانیہ آنے کے لیے آن لائن  استثنی کے لیے کارروائی مکمل کریں۔

برطانیہ کی ہوم سکریٹری پریتی پٹیل نے کہا کہ ’بحرین اور سعودی عرب کے لیے ویزا استثنی ہمارے ممالک کے لوگوں کو بہتر طریقے سے جوڑ دے گی اور معاشی خوشحالی کو فروغ دے گی۔‘

ان کا مزید کہنا تھا کہ ’ آج اعلان کردہ ویزا امپرومینٹس ہمارے شہریوں کو زیادہ تحفظ فراہم کریں گی جبکہ خلیج سے آنے والوں کے لیے تفریح اور کاروبار کے لیے یہاں سفر کرنا آسان اورسستا ہو گا۔

سکریٹری خارجہ لز ٹرس نے کہا کہ ’اس اقدام سے سعودی عرب اور بحرین کے ساتھ برطانیہ کے تعلقات مزید مضبوط ہوں گے‘۔

انہوں نے کہا کہ ’ دونوں ممالک کے ساتھ ہماری دوستی بہت اہمیت کی حامل ہے جو تجارت، سرمایہ کاری اور سلامتی جیسی مشترکہ ترجیحات پر قائم ہے۔‘

سعودی عرب میں برطانیہ کے سفیر نیل کرومپٹن نے ٹوئٹر پر ایک ویڈیو پوسٹ کی جس میں اس اقدام کی وضاحت کی گئی ہے۔

برطانوی سفیر نے وڈیو بیان میں کہا کہ’ یکم جون سے کوئی بھی سعودی شہری الیکڑانک ویز استثنی کے لیے آن لائن درخواست دے سکے گا۔ یہ اقدام دونوں ملکوں کے دوطرفہ تعلقات کو فروغ دینے کی خواہشن سے ہم آہنگ اور بڑی تبدیلی کا آئینہ دار ہے‘۔

برطانوی سفارتخانے نے بتایا کہ’ یکم جون سے سعودی پاسپورٹ رکھنے والوں کو چوبیس گھنٹے کے اندر37 ڈالر( 30 پونڈ) میں الکیڑانک ویزے سے استثنی مل سکتا  ہے‘۔

سفارتخانے نے وضاحت کی کہ ’جن درخواست دہندگان کو الیکڑانک ویزے سے استثنی کی منظوری مل چکی ہے۔ اس کا پرنٹ لینا چاہیے اور برطانیہ میں پہنچنے کے بعد اس پر حکام کے سا منے پیش ہو کر منظوری لینا ہوگی‘۔

سبق نیوز اورالعربیہ کے مطابق سعودی عرب اور بحرین کے باشندے انٹرنیٹ کے ذریعے سفری کارروائی کے ذریعے ویزے سے استثنی حاصل کرسکتے ہیں۔ انہیں ویزا لینے کی  ضرورت نہیں ہوگی۔ سفر سے قبل انہیں ویزا سینٹر سے رجوع کرنا ہوگا اور نہ فنگر پرنٹس وغیرہ کی کارروائی کرانا ہوگی۔ 

ویزا فیس جو پہلے 125 ڈالر تھی اب ویزے سے استثنی کی علامتی فیس لی جائے گی جو معمولی ہوگی۔ سعودی عرب اور بحرین کے شہری چھ ماہ تک برطانیہ میں قیام کے لیے درخواست دے سکتے ہیں۔

برطانوی وزارت داخلہ کا کہنا  ہے کہ ’ویزے سے آن لائن استثنی کی کارروائی سفر سے 3 ماہ پہلے کی جاسکتی ہے۔ 48 گھنٹے پہلے تک بھی کارروائی کی سہولت مہیا ہے‘۔

علاوہ ازیں برطانیہ میں سعودی سفارتخانے نے سعودی باشندوں کو ویزا کارروائی سے استثنی دینے اور آن لائن کارروائی کے فیصلے پر برطانوی حکام کا شکریہ ادا کیا ہے۔

سبق ویب سائٹ کے مطابق سعودی سفارتخانے نے بیان میں کہا کہ’ برطانوی حکام نے فیصلہ کیا ہے کہ سعودی شہریوں کو برطانیہ آنے کے لیے ویزا کارروائی  ضروری نہیں اور وہ آن لائن استثنی کی کارروائی کرکے برطانیہ آسکتے ہیں‘۔

بیان میں کہا گیا کہ’ یہ دونوں ملکوں کے درمیان تمام شعبوں میں تعلقات کو مضبوط بنانے کی جہت میں اہم قدم ہے۔ اس سے دونوں ملکوں کے درمیان تعاون بڑھے گا اور اس حوالے سے دونوں دوست ملکوں کی خواہش پوری ہوگی‘۔