سکوئڈ گیم: قاتل گڑیا لوگوں کی جان لینے پھر آ گئی

انٹرنیٹ کی دنیا میں جہاں ہر چیز ڈیجیٹل ہوچکی ہے وہیں فلموں اور ٹی وی شوز کا بھی آن لائن سٹریمنگ پلیٹ فارمز پر دستیاب ہونا اب کوئی انوکھی چیز نہیں ہے۔

ایک سیزن آتا ہے اور اس کے شوقین اسے ایک ہی نشست میں دیکھ لیتے ہیں اور پھر اگلے سیزن کے لیے سال بھر یا اس سے بھی زیادہ مدت تک انتظار کرتے ہیں۔

ایسی ہی کچھ حالت ’سکوئڈ گیم‘ کے مداحوں کی ہے جو سال بھر سے نیٹ فلکس کے سب سے مشہور شو کے دوسرے سیزن کا انتظار کر رہے ہیں۔

نیٹ فلکس نے اتوار کو جب سکوئڈ گیم کے سیزن 2 کے آنے کا اعلان کیا تو مداحوں میں خوشی کی لہر دوڑ گئی ہے۔

سکوئڈ گیم جنوبی کوریا کی شہرہ آفاق ویب سیریز ہے جس کا پہلا سیزن 2021 میں ریلیز کیا گیا تھا۔

سکوئڈ گیم کی کہانی ایک ایسے پُراسرار کھیل کے گرد گھومتی ہے، جس میں ایک دوسرے سے انجان لوگ ایک جزیرہ نما مقام پر جاتے ہیں جہاں انہیں مختلف کھیل کھیل کر پیسے جیتنے کا موقع دیا جاتا ہے۔

کہانی میں دل دہلا دینے والی بات یہ ہے کہ کھیل کے دوران کسی بھی قسم کی غلطی کرنے پر کھلاڑی کو موقع پر ہی قتل کردیا جاتا ہے۔

کھیل کے منتظمین ایک گڑیا کے ذریعے تمام کھیل چلاتے ہیں۔ وہ کون ہیں؟ کہاں سے ہیں؟ یہ نیٹ فلیکس پر آنے والے سیزن 2 میں ہی پتا چل سکے گا۔

’سکوئڈ گیم‘ کے سیزن 2 کے اعلان کے بعد سماجی رابطوں کی ویب سائٹ ٹوئٹر پر مداح بے صبری کا شکار ہیں اور جلد از جلد یہ سیزن دیکھنا چاہتے ہیں۔

ٹوئٹر پر ایک صارف انجیلیکا کہتی ہیں کہ ’مجھ سے مزید انتظار نہیں ہورہا۔ میں کورین ٹی وی سیریز سے بہت پیار کرتی ہوں۔‘

شیکھر نامی ایک صارف کہتے ہیں ’میری سبسکرپشن سیزن 2 کا انتظار کر رہی ہے۔ نئے چیلنج، نئی سنسنی دیکھنے کا انتظار نہیں ہورہا۔‘

یاسمین نامی صارف نے نیٹ فلکس سے پہلے سیزن کے مشہور کردار ’چو سانگ وو‘ کو واپس لانے کی استدعا کی۔

 ایک اور صارف نے کہا کہ ’سیزن دو کی تصدیق ہوگئی ہے اور جوش ایک نہایت معمولی لفظ ہے۔‘

نیٹ فلکس کے مطابق سکوئڈ گیم کے سیزن 2 میں مرکزی کردار سیوونگ جی ہون (لی جنگ جائے) کے علاوہ فرنٹ مین اور بقیہ کرداروں سمیت گڑیا کا بوائے فرینڈ بھی نظر آئے گا۔

خیال رہے نیٹ فلکس کی جانب سے سکوئڈ گیم سیزن 2 کی ریلیز کی تاریخ کا اعلان نہیں کیا گیا۔ تاہم اس کے سیزن 2 کے 2023 کے آغاز میں ریلیز ہونے کے امکانات ہیں۔