پاکستانی خاتون سیاح نے جھیل میں گرنے والے نوجوان کو بچا لیا

گھر سے دور سیاحت کے لیے جانے والے اپنے معمولات ترک کر کے موسم اور قدرتی نظاروں سے محظوظ ہونے اور بھرپور تفریح بھرے لمحات گزارنے کے خواہشمند ہوتے ہیں، بعض اوقات کچھ ایسا سامنے آ جاتا ہے کہ سیاحوں کی تفریح چھڑا کر انہیں اپنی جانب متوجہ کر لیتا ہے۔

پاکستان خاتون ڈاکٹر اور ان کے شوہر کے ساتھ بھی کچھ ایسا ہی ہوا جو تفریح کی غرض سے گلگت بلتستان پہنچے لیکن وہاں ایک نوجوان کی زندگی بچانے کا ذریعہ بن گئے۔

ملتان سے سیاحت کے لیے جانے والی خاتون ڈاکٹر اور ان کے شوہر نے گلگت بلتستان کی نلتر جھیل میں گرنے والے نوجوان کو فوری طبی امداد دے کر اس کی زندگی بچائی تو جوڑے کی ویڈیو سوشل میڈیا پر وائرل ہو گئی۔

چند روز قبل گلگت بلتستان کی نلتر جھیل میں دو نوجوان ڈوب گئے تھے ان میں سے ایک انتقال کر گیا جب کہ دوسرے کو بچا لیا گیا تھا۔

اردو نیوز سے بات کرتے ہوئے ہوئے ڈاکٹر قرۃ العين ہاشمی نے کہا کہ یہ واقعہ 14 جون کو اس وقت پیش آیا جب نلتر جھیل میں ڈوبتے ہوئے ایک نوجوان کو دوسرے نے بچانے کی کوشش کی لیکن دونوں ڈوب گئے۔

ڈاکٹر قرۃ العين ہاشمی نے کہا کہ ’یقین نہیں آ رہا تھا کہ 16 سالہ نوجوان زندہ بچ جائے گا لیکن سی پی آر کی مدد سے اس کی جان بچ گئی۔‘

خاتون ڈاکٹر کے مطابق وہ اپنی فیملی کے ہمراہ گلگت آئی تھیں۔ ’جب ہم نلتر جھیل کے قریب سے گزرہے تھے تو نیچے سے آوازیں آتی سنائی دیں، شوہر نے گاڑی سے اتر کر دیکھا تو مجھے آواز دی کہ جلدی آئیں آپ کی ضرورت ہے‘۔ 

’پہلے ایسا لگا کہ یہ نوجوان اپنی زندگی کی بازی ہار چکا ہے لیکن میرے ساتھ مل کر شوہر نے اس نوجوں کو سی پی آر دیا تو اس کی سانس بحال ہوئی اور تھوڑی ہی دیر میں اس کی آنکھیں کھل گئیں۔ بد قستمی سے ڈوبنے والا ایک 14 سالی لڑکا نہیں بچ سکا کیونکہ شاید جھیل میں اس کا سر کسی پتھر سے ٹکرا گیا تھا۔‘

نوجوان کو بچانے کی کوشش کرنے پر سوشل میڈیا صارفین نے ڈاکٹر قرۃ العين اور ان کی شوہر اسرار کو سراہا تو انہیں ہیرو قرار دیا۔

سابق وفاقی وزیرمملکت زرتاج گل نے ڈاکٹر قرۃ العین کی کاوش پر انہیں خراج تحسین پیش کیا۔

کاشف انور یوسفزئی نے ڈاکٹر قرۃ العین کے بارے میں لکھا ہے کہ ’ہمیں آپ پر فخر ہے۔‘

دی نارتھنر نے صدر مملکت ڈاکٹر عارف علوی کو مینشن کرتے ہوئے لکھا  کہ ڈاکٹر قرۃ العین ہاشمی مسیحائی کی زندہ مثال ہیں۔ انسانیت کے لیے ان کے اس بےلوث اقدام کی پزیرائی کی جانی چاہیے۔