خاتون رپورٹر نے لڑکے کو تھپڑ کیوں مارا؟

پاکستان کے صوبہ پنجاب کے مرکزی شہر لاہور میں رپورٹنگ کے دوران مبینہ طور پر تنگ کرنے پر ایک خاتون رپورٹر نے ایک نوعمر لڑکے کو کیمرے کے سامنے تھپڑ ماردیا۔

اس واقعے کی ویڈیو پیر کو پاکستان میں سوشل میڈیا پر وائرل ہوئی جس میں آتشی اور کالے رنگ کا لباس پہنے خاتون رپورٹر کو ایک لڑکے کو تھپڑ مارتے ہوئے دیکھا جاسکتا ہے۔

خاتون رپورٹر کے ہاتھ میں لاہور میں واقع ایک نجی چینل ’لاہور رنگ‘ کا مائیک دیکھا جاسکتا ہے اور ان کا نام مائرہ ہاشمی ہے۔

اس ویڈیو کے انٹرنیٹ پر وائرل ہونے کے بعد مائرہ نے اس لڑکے کو تھپڑ مارنے کی وجہ بھی بتائی

اپنی ایک ٹویٹ میں انہوں نے مؤقف اختیار کیا کہ ’یہ لڑکا انٹرویو کے دوران فیملی کو تنگ کر رہا تھا جس کی وجہ سے فیملی پریشان ہوگئی تھی۔‘

انہوں نے مزید لکھا کہ ’میں نے پہلے پیار سے سمجھایا کہ ایسا نہیں کرو مگر سمجھانے کے باوجود یہ لڑکا نہیں سمجھا اور زیادہ ہلڑ بازی کر رہا تھا۔‘

اس ویڈیو کے وائرل ہونے کے بعد سوشل میڈیا صارفین بھی طنز و مزاح سے بھرپور تبصرے کرتے نظر آئے۔

عبدالصبور نامی صارف نے طنزیہ تبصرہ کرتے ہوئے لکھا ’لاہور رنگ کی رپورٹر مائرہ ہاشمی عید کی خوشیاں دوبالا کرتے ہوئے۔ آپ بھی خوشیاں دوبالا کریں۔‘

صحافی اسد علی طور نے اپنے اکاؤنٹ سے یہ ویڈیو پوسٹ کی اور لکھا ’انشااللہ یہ بچہ مستقبل میں کسی بھی صحافی کو ریکارڈنگ کرواتا دیکھ کر بھاگ جایا کرے گا۔‘

سوشل میڈیا پر کچھ صارفین ایسے بھی ہیں جو رپورٹر کی اس حرکت پر ناخوش نظر آئے۔

مرتضیٰ چوہدری نامی صارف نے لکھا ’بچوں کے ساتھ ایسا سلوک قابل قبول نہیں ہے۔ ان صحافی صاحبہ کا تعلق لاہور نیوز سے ہے، ان کا نام مائرہ ہاشمی ہے۔‘