چار لاکھ سے زائد حجاج اپنے ملک واپس جاچکے
ہفتہ 23 جولائی 2022 20:40
بری ، بحری اور فضائی راستوں سے حجاج کی واپسی کا عمل جاری ہے(فوٹو، ایس پی اے)
وزارت حج وعمرہ کا کہنا ہے کہ اب تک 4 لاکھ سے زائد حجاج کرام اپنے ملکوں کوروانہ ہوچکے ہیں۔ حجاج کی واپسی کا عمل فضائی، بحری اور بری راستوں سے جاری ہے۔
سبق نیوز نے وزارت حج وعمرہ کی جانب سے جاری اعداد وشمار کے حوالے سے مزید کہا ہے کہ جدہ کے شاہ عبدالعزیز انٹرنیشنل ایئرپورٹ اور مدینہ منورہ کے شہزادہ محمد بن عبدالعزیز ایئرپورٹ سے اب تک 3 لاکھ 65 ہزار 457 حجاج اپنے ملکوں کو روانہ ہوگئے۔
زمینی راستوں سے آنے والے حجاج میں سے 31 ہزار629 بسوں کے ذریعے جبکہ 5 ہزار 701 حجاج بحری ذریعے سے اپنے ملک جاچکے ہیں۔
واضح رہے جدہ کے شاہ عبدالعزیز ایئرپورٹ کے حج ٹرمنل کے علاوہ مدینہ منورہ کے شہزادہ محمد بن عبدالعزیز بین الاقوامی ہوائی اڈے پرمحکمہ امیگریشن اینڈ پاسپورٹ کی جانب سے حج سیزن کے لیے خصوصی کاونٹرز قائم کیے جاتے ہیں۔
جدہ حج ٹرمنل پرامسال حج سے قبل امیگریشن کاونٹرز کی تعداد میں بھی اضافہ کیا گیا تھا تاکہ حجاج کی روانگی کے عمل کو مزید بہتربنایا جائے۔
