ریاض .... ضباء بندرگاہ کے افسران نے 4مختلف کارروائیوں میں41لاکھ سے زیادہ نشہ آور گولیاں اسمگل کرنے کی کوشش ناکام بنادی۔ ضباء بندرگاہ کسٹم کے سربراہ علی العطوی نے واس کو بتایا کہ کسٹم افسران نے پیاز کی بوریوں میں چھپائی جانے والی نشہ آور گولیاں برآمد کی تھیں۔ دوسری کارروائی میں پڑوسی ملک سے آنے والے کنٹینر میں لکڑی کے تخت پہنچے تھے جن کے اندر انتہائی مہارت سے نشہ آور گولیاں چھپائی گئی تھیں۔ تیسری کارروائی میں ماربل کاٹنے والے آلات کے اندر گولیاں چھپا کر لانے کی کوشش کی جارہی تھی۔ آخری کارروائی میں کسٹم افسران کی ہوشیاری سے اسمگلنگ کی کوشش ناکام بنادی گئی جس میں ٹرکوں کے خفیہ خانوں میں نشہ آور گولیاں اسمگل کرنے کی کوشش کی جارہی تھی۔ انہوں نے کہا کہ ضبط شدہ سامان اور اسمگلروں کو محکمہ انسداد منشیات کے حوالے کردیا گیا ہے۔
