بہنوں کے بیگ اٹھانے والا 9 سالہ مشعل سوشل میڈیا پر ہیرو بن گیا

سعودی عرب میں ایک بچے کی تصویر سوشل میڈیا پروائرل ہوئی ہے جس میں وہ انہوں نے اپنا اور دو بہنوں کے بیگ اٹھا رکھے ہیں۔

العربیہ کے مطابق 9 سالہ مشعل الشہرانی کو سکول سے واپسی پر اپنی دو بہنوں کے سکول بیگ اٹھائے دھوپ میں چلتے دیکھا جا سکتا ہے۔

تصویر نے سعودی شہریوں کی توجہ حاصل کی ہے اور اسے بے حد پسند کرتے ہوئے مشعل الشہرانی کو ’مردانہ شان‘ والا بچہ قرار دیا ہے۔

وہ خمیس مشیط کے ابن نفیس ایلیمنٹری سکول کے طالب علم ہیں اوراس وقت سوشل میڈیا پر ہیرو بن چکے ہیں۔

مشعل الشہرانی  نے کہا ہے کہ ’میں ہمیشہ اپنے گھر والوں کی مدد کرنا چاہتا ہوں، خاص طور پر اپنی بہنوں سارہ اور نورا کو سکول سے واپسی پر ان کے بیگ اٹھانے میں ان کی مدد کرتا ہوں۔‘

’جب بیگ اٹھائے میری تصویر لی گئی تو اس وقت گرمی بہت زیادہ تھی۔ سخت گرمی اور ہجوم میں بہنوں سے بیگ لے لیے، اس دوران کسی فوٹو گرافر نے میری تصویر لی اور سوشل میڈیا پر ڈال دی۔‘

درایں اثنا خمیس مشیط کے میئر اور عسیر میں محکمہ تعلیم کے ڈائریکٹر نے بچے کی تعریف کرتے ہوئے کہا ہے کہ مشعل الشہرانی نے جو کیا، وہ ان کی اچھی تعلیم و تربیت کی عکاسی کرتا ہے۔

ادھر خمیس مشیط کے متعدد نجی سکولوں نے مشعل اور ان کی دونوں بہنوں کو دو سال کے لیے مفت تعلیم حاصل کرنے کی پیشکش بھی ہے جبکہ سوشل میڈیا صارفین میں سے بعض نے ان کو تحائف بھی ارسال کیے ہیں۔