امرتسر میں گولڈن ٹیمپل کے قریب ’تمباکو چبانے‘ پرایک شخص قتل، ویڈیو وائرل

انڈیا کی ریاست پنجاب کے شہر امرتسر میں تین افراد نے مبینہ طور پر گولڈن ٹیمپل کے قریب ایک سڑک پر مبینہ طور پر تمباکو کھانے پر ایک شخص کو قتل کردیا ہے اور اس قتل کی ویڈیو سوشل میڈیا پر وائرل ہوگئی ہے۔

انڈین چینل این ڈی ٹی وی کے مطابق امرتسر میں سینیئر پولیس افسر رمندیپ سنگھ کا کہنا ہے کہ ہرمنجیت سنگھ نامی شخص پر حملہ کرنے والوں کی تعداد تین تھی اور ان میں سے ایک شخص کو گرفتار کرلیا گیا ہے۔

ایک ہوٹل کے باہر لگے سی سی ٹی وی ویڈیو میں یہ قتل ریکارڈ ہوگیا تھا اور دیکھا جاسکتا ہے کہ مرنے والے کا جسم پوری رات ایک نالی کے کنارے سڑک پر پڑا رہا اور اسے صبح پولیس کی آمد کے بعد وہاں سے اٹھایا گیا۔

امرتسر کے پولیس کمشنر کے ٹوئٹر اکاؤنٹ سے جاری ایک ویڈیو میں کمشنر پولیس ارن پال سنگھ نے اس قتل کو ’بدقسمت واقعہ‘ قرار دیتے ہوئے کہا کہ قاتلوں نے ہرمنجیت سنگھ پر شراب پینے اور تمباکو کھانے کا الزام لگایا اور انہیں زخمی کردیا۔

پولیس کمشنر کے مطابق فوری طبی امداد نہ ملنے کے سبب زخمی شخص زیادہ خون بہہ جانے سے ہلاک ہوگیا۔

ان کا مزید کہنا تھا کہ ’تینوں ملزمان کی شناخت ہوگئی ہے اور ایک کو گرفتار بھی کرلیا گیا ہے۔‘