اے بھائی، ذرا دیکھ کے چلو، نئی دہلی پولیس کی طنزیہ ٹویٹ

پاکستان اور سری لنکا کے درمیان ایشیا کپ کے فائنل کے دوران پاکستانی فیلڈرز شاداب خان اور آصف علی کی آپس میں ہونے والی ٹَکر کا جہاں انٹرنیٹ پر خوب مذاق بنایا جارہا ہے وہیں انڈیا کے دارلحکومت نئی دہلی کی پولیس نے بھی اس چیز کا مزہ لیا ہے۔
پیر کے روز سماجی رابطوں کی ویب سائٹ ٹوئٹر پر نئی دہلی پولیس کے آفیشل ہینڈل نے شاداب خان اور آصف علی کے ٹکرانے کی ویڈیو کو شیئر کرتے ہوئے لکھا ہے کہ ’ائے بھائی، ذرا دیکھ کے چلو۔‘

نئی دہلی پولیس کی جانب سے اس ویڈیو کے بیک گراؤنڈ پر 1970 میں ریلیز ہونے والی مشہور فلم میرا نام جوکر کا گانا ’اے بھائی ذرا دیکھ کے چلو‘ کو بھی لگایا گیا ہے۔
آصف علی اور شاداب خان کے درمیان یہ ٹکراؤ میچ کے 19 ویں اوور میں ہوا جب محمد حسنین کی گیند پر بھنوکا راجاپکسا نے شاٹ لگائی جس پر گیند پکڑنے کے لیے آصف علی تیار تھے لیکن شاداب خان ان میں آکر ٹکرا گئے جس کے باعث گیند باؤنڈری سے باہر چلی گئی۔

نئی دہلی پولیس کی اس طنزومزاح کی ٹویٹ پر صارفین کی جانب سے بھی تبصرے دیکھنے میں آرہے ہیں۔
 

صحافی فیضان لاکھانی نے اس کے جواب میں 2017 میں ہونے والی آئی سی سی چیمپیئنر ٹرافی کے فائنل میں جسپریت بمراہ کی جانب سے پھینکی گئی نو بال کی تصویر لگا دی اور کہا کہ ’بالکل بھائی، لائن کو تو بالکل بھی کراس نہیں کرنے کا۔‘
 

کونراڈ باروا نامی ایک ہینڈل نے مایوسی کا اظہار کرتے ہوئے کہا کہ ’میرے خیال سے یہ دہلی پولیس کا آفیشل ٹوئٹر اکاؤنٹ ہے۔‘
 

فردین جاوید کہتے ہیں کہ ’دہلی میں ہر روز زیادتی کے چھ اور جنسی استحصال کے سات کیسز رپورٹ ہوتے ہیں جو کہ اس سال 6 فیصد بڑھے ہیں، اسی طرح 2 ہزار 197 اغوا کے کیسز رواں سال رپورٹ ہوچکے ہیں لیکن دہلی پولیس کے آفیشل ہینڈل کے پاس یہ سب کرنے کا وقت ہے۔‘