رقم کے عوض بلیو بیج حاصل کرنے کا پہلا مرحلہ نومبر کے اوائل میں شروع کیا گیا تھا۔ فائل فوٹو: اے ایف پی
کئی ناکام کوششوں کے بعد ٹوئٹر نے اعلان کیا ہے کہ کمپنی سبسکرپشن سروس اگلے ہفتے سے دوبارہ شروع کر رہی ہے جس میں پلیٹ فارم پر موجود اکاؤنٹس کی تصدیق کا نظام متعارف کرانا بھی شامل ہے۔
ٹوئٹر نے اعلان کیا کہ ’ہم پیر کے دن سے ٹوئٹر بلیو کی سبسکرپشن دوبارہ شروع کر رہے ہیں۔ اس کے تحت ویب کے لیے ماہانہ آٹھ ڈالر جبکہ آئی فون کے لیے ماہانہ 11 ڈالر بلیو مارک سمیت سبسکرائبر فیچرز شامل ہوں گے۔‘
ٹوئٹر پر ’بلیو چیک مارک‘ قبل ازیں مفت تھا جس سے یہ ثابت ہوتا ہے کہ مذکورہ اکاؤنٹ مصدقہ اور کسی کمپنی یا پبلک فگر کا ہے تاکہ غلط معلومات اور جعلی شناخت سے بچا جا سکے۔
اکتوبر میں ٹوئٹر کو خریدنے کے بعد ارب پتی ایلون مسک نے کمپنی کے ریونیو ذرائع کو اشتہارات کے علاوہ بھی پھیلانے کا اعلان کیا تھا جس کے تحت پریمیئم فیچرز کے لیے صارفین کو ادائیگی کرنا ہوگی۔
رقم کے عوض بلیو بیج حاصل کرنے کا پہلا مرحلہ نومبر کے اوائل میں اس وقت شروع کیا گیا جب ایلون مسک کو ٹوئٹر کا کنٹرول سنبھالے ابھی 10 دن ہوئے تھے۔
کئی جعلی اکاؤنٹس کی رقم دے کر تصدیق اور متعدد کمپنیوں کے غلط شناخت کے ذریعے بلیو بیج حاصل کرنے پر اٹھنے والے شور کے بعد ٹوئٹر نے اس ورژن کو فوری طور پر معطل کر دیا تھا۔
کمپنی کے مطابق نئی آفر کے تحت ایسے تمام اکاؤنٹس جو ادائیگی کر کے ’بلیو چیک مارک‘ حاصل کرنے کے خواہشمند ہوں گے اُن کا تجزیہ کیا جائے گا۔
اپریل میں ایلون مسک نے ٹوئٹر 44 بلین ڈالر میں خریدا تھا۔ (فوٹو: اے ایف پی)
گزشتہ ماہ ایلون مسک نے اعلان کیا تھا کہ ٹوئٹر اکاؤنٹس کے درمیان فرق واضح کرنے کے لیے مختلف رنگوں کے بیجز لانچ کرے گا۔
ایلون مسک نے اس حوالے سے تفصیلات بتاتے ہوئے کہا تھا کہ ’کمپنیوں کے لیے سنہرا، سرکاری اداروں اور افراد کے لیے گرے، کسی بھی سلیبریٹی یا عام شخص کے لیے نیلا رنگ مختص ہوگا۔‘
ایک اور ٹویٹ میں انہوں نے کہا کہ تمام تصدیق شدہ انفرادی اکاؤنٹس کے لیے ایک ہی بلیو ٹک ہوگا تاہم کچھ (اکاؤنٹس) کے آخر میں ایک چھوٹا لوگو دِکھائی دے گا جس میں سے یہ ظاہر ہوتا ہے کہ وہ کسی تنظیم سے تعلق رکھتے ہیں اگر اس تنظیم کے ذریعے تصدیق کی گئی ہو۔‘
ایلون مسک کی جانب سے صارفین کے لیے ’تصدیق شدہ‘ ہونے کے لیے ادائیگی کرنے کی تجویز پر گذشتہ ماہ سے انہیں تنقید کا نشانہ بنایا جا رہا ہے۔
’اگر ٹوئٹر بھی ویڈیو بنانے والوں کو معاوضہ دے تو۔۔۔؟‘Node ID: 719821
ٹوئٹر ’بند ہو جانے‘ کا خوف، صحافی کیوں سب سے زیادہ پریشان؟Node ID: 720396
گولڈن، گرے اور بلیو، ٹوئٹر کے نئے بیجز کس کس کو ملیں گے؟Node ID: 720826
