حنا ربانی کے دورہ افغانستان پر خواتین وزرا سے تلخ کلامی پھر معافی
پیر 12 دسمبر 2022 22:01
وسیم عباسی -اردو نیوز، اسلام آباد
پاکستان کی قومی اسمبلی میں جماعت اسلامی کے رکن قومی اسمبلی مولانا عبدالاکبر چترالی کی جانب سے وزیرمملکت برائے خارجہ حنا ربانی کھر کے دورہ افغانستان پر اعتراض کے بعد ان کی خواتین وزرا مریم اورنگزیب، شازیہ مری اور شیریں رحمن سے تلخ کلامی ہو گئی۔
قومی اسمبلی میں خطاب کرتے ہوئے اکبر چترالی کا کہنا تھا کہ حنا ربانی کھر کو افغانستان بھیجا گیا جس کا اثر نہیں ہوا اور روزانہ کی بنیاد پر افغانستان سے حملے ہورہے ہیں۔
مولانا چترالی کے ریمارکس پر ان کی شازیہ مری، شیری رحمان اور مریم اورنگزیب سے شدید جھڑپ ہوئی اورایوان میں ہنگامہ دیکھنے میں آیا۔
اپوزیشن کی نشتسوں پر موجود مولانا چترالی اور حکومتی خواتین ارکان کے درمیان تلخ جملوں کا مقابلہ ہوا۔ تاہم بعد میں سابق سپیکر ایاز صادق کی مداخلت پر مولانا چترالی نے اپنے الفاظ واپس لے لیے اور دل آزاری پر معذرت کر لی۔
اس موقع پر مریم اورنگزیب کا کہنا تھاکہ حنا ربانی کھر ہماری وزیر مملکت ہیں، افغانستان جا کر بات چیت کی اور پوری قوم کی نمائندگی کی۔
ان کا کہنا تھاکہ عبدالاکبر چترالی نے ایسا کیوں کہا کہ وہ خاتون ہیں ان کے جانے سے کوئی فرق نہیں پڑا۔
وزیراطلاعات مریم اورنگزیب نے کہا کہ حنا ربانی کھر میری کولیگ بھی ہیں۔ ’انہیں میں نے انتہائی تندہی، محنت اور قابلیت کے ساتھ سرکاری امور انجام دیتے ہوئے دیکھا ہے۔ اللہ تعالی نے انہیں عزت دی ہے۔ وہ خاتون ہونے کی وجہ سے اس منصب پر نہیں بلکہ اپنی تعلیم، قابلیت اور پیشہ ورانہ لیاقت کی وجہ سے آج اس منصب اور مقام پر ہیں۔‘
انہوں نے کہا کہ پاکستان کی تاریخ اُن مثالوں اور شخصیات سے بھری ہوئی ہے۔ خواتین نے قیام پاکستان میں شاندار کردار ادا کیا، آزادی کے لیے عظیم قربانیاں دیں۔ مادر ملت محترمہ فاطمہ جناح کی مثال ہمارے سامنے ہے۔ شہید محترمہ بے نظیر بھٹو اسلامی دنیا کی پہلی خاتون وزیراعظم تھیں۔ انہوں نے تاریخی سیاسی جدوجہد کی اور اپنی جان کا نذرانہ پیش کیا۔ مادر جمہوریت محترمہ بیگم کلثوم نے تاریخی سیاسی جدوجہد کی، ایک آمر کا ڈٹ کر مقابلہ کیا۔
مریم اورنگزیب نے کہاکہ اس ایوان میں بیٹھے ہر شخص کو خواتین ارکان پارلیمان کی حوصلہ افزائی کرنی چاہیے کیونکہ ملک کی پچاس فیصد خواتین آبادی کی نمائندگی کرتی ہیں۔ وزیر اطلاعات نے کہاکہ وزیر مملکت حنا ربانی کھر کا افغانستان میں پاکستان کی نمائندگی کرنا پورے پاکستان کے لئے باعث فخر ہے۔
گزشتہ ماہ میں خود اسلامی کانفرنس تنظیم (او۔آئی۔سی) کے وزرااطلاعات کی کانفرنس میں شرکت کے لئے گئی تھی۔ میں فخر کے ساتھ ایوان کو بتانا چاہتی ہوں کہ اس کانفرنس میں شریک 48 اسلامی ممالک میں سے میں واحد پاکستان کی خاتون وزیراطلاعات تھی۔ یہ پاکستان کے لئے اورہم سب کے لئے بڑے فخر کی بات ہے۔ انہوں نے کہاکہ اگر کوئی اس ایوان میں خواتین کے خلاف بات کرے گا تو دنیا میں ہمارے ملک کے بارے میں کیا تاثر جائے گا۔
وزیراطلاعات مریم اورنگزیب نے کہاکہ جب افغانستان کو اس سلسلے میں کوئی مسئلہ نہیں تو پھر اس ایوان میں ایسی بات کیوں کی جارہی ہے۔ جس روز وزیرملکت حنا ربانی کھر کابل گئیں اور وہاں طالبان نمائندوں سے مذاکرات کررہی تھیں، تو ان کو دیکھ کر میں فرط جذبات میں آگئی ۔ یہ پاکستان کے لئے کتنے فخر کی بات ہے کہ اس کی خواتین اعلی ترین مناصب پر ملک وقوم کی نمائندگی کررہی ہیں، خدمت کررہی ہیں۔ اس پر پاکستان بھر کی خواتین کو مبارک پیش کرنی چاہئے۔
