حرمین شریفین انتظامیہ کا 100 نومسلموں کے اعزاز میں استقبالیہ

سعودی عرب میں حرمین شریفین انتظامیہ کے ماتحت تعلقات عامہ کے ادارے نے دنیا کے مختلف ممالک  سے مسجد الحرام اور مسجد نبوی کی زیارت کے لیے آنے والے 100 نومسلموں کے اعزاز میں استقبالیہ دیا۔ 

سبق ویب سائٹ کے مطابق حرمین شریفین انتظامیہ کے ادارے نے عبدالقادر المھیدب فاؤنڈیشن کے تعاون سے 30 ممالک کے نومسلموں کے لیے عمرہ پروگرام کا اہتمام کیا۔ 

عمرہ پروگرام کے تحت نومسلموں کو دین اسلام سے متعارف کرانا اور انہیں عمرہ کے طریقہ کار اور اس کے احکام سے روشناس کرانا بھی ہے۔

اس مقصد کے لیے حرمین شریفین انتظامیہ نے نومسلموں کو فقہی احکام سکھانے کے لیے سپیشل لیکچر کا اہتمام کیا۔ شیخ محمد عبدالرحمن نے اس موضوع پر لیکچر دیا۔ 

انتظامیہ نے نومسلموں کو مسجد الحرام کی مختلف عمارتوں سے متعارف کرانے کے لیے معلمین بھی فراہم کیے۔ غلاف کعبہ کنگ عبدالعزیز کمپلیکس کا بھی دورہ کرایا۔ 

یاد رہے کہ عمرہ پروگرام میں شامل نومسلموں نے مدینہ منورہ میں مسجد نبوی کی زیارت کی اور اس کی لائبریری سے بھی استفادہ کیا۔

اس موقع پر امام مسجد نبوی سے ملاقات کرائی گئی۔ نومسلموں کے مختلف سوالات کے جواب بھی دیے گئے۔