ٹریفک سگنل توڑنے پر جرمانہ تین ہزار سے کم کر کے 500 ریال کرنے کی تجویز 

سعودی مجلس شورٰی کے سابق رکن میجر جنرل (ر) عبداللہ السعدون نے ٹریفک سگنل توڑنے پر جرمانے کی رقم تین ہزار سے کم کر کے 500 ریال کرنے کی تجویز دی ہے۔

اخبار 24 کے مطابق سابق رکن شورٰی نے اپنے ٹوئٹر اکاؤنٹ پر ارکان شورٰی سے درخواست کی کہ ’وہ اس تجویز پر ٹریفک قانون کی متعلقہ دفعہ میں ترمیم کریں۔‘ 

انہوں نے جرمانے میں کمی کے حق میں دلیل دی کہ ’  بیشتر افراد جان بوجھ کر سگنل نہیں توڑتے۔ سگنل توڑنے کا عمل غلطی سے ہوتا ہے۔ اس کے متعدد اسباب ہوتے ہیں۔ مثال کے طور پر سگنل کے وسط میں گاڑی روکنی پڑ جاتی ہے۔‘ 

سابق رکن شورٰی کی تجویز کی ایک رکن شورٰی نے حمایت کی جبکہ دیگر نے اس کی مخالفت میں رائے دی ہے۔

ان کا موقف ہے کہ ’ٹریفک سگنل کی خلاف ورزی کرنے والا کڑی سے کڑی سزا کا مستحق ہے۔‘ 

سوشل میڈیا پرایک صارف کا کہنا تھا کہ ’جو شخص دوسروں کی زندگی کو خطرے میں ڈال رہا ہو وہ اس بات کا مستحق ہے کہ اس پر نہ صرف بڑا جرمانہ ہو بلکہ ا کا ڈرائیونگ لائسنس بھی ضبط کر لیا جائے۔‘