جنید صفدر سیاست میں حصہ لینے پاکستان آئے ہیں؟

پاکستان مسلم لیگ (ن) کی سینیئر نائب صدر مریم نواز کے صاحبزادے اور سابق وزیر اعظم نواز شریف کے نواسے جنید صفدر جمعرات کو لندن سے لاہور پہنچے ہیں اور ایسی اطلاعات بھی سامنے آئیں تھیں کہ اب وہ مستقل طور پر وہیں قیام کریں گے۔

جنید صفدر کی مستقل طور پر لاہور واپسی پر پاکستان مسلم لیگ (ن) کے ناقدین اور حامیوں کی جانب سے یہ قیاس آرائیاں کی جا رہی تھیں کہ ان کا پاکستان واپس آنے کا مقصد شاید سیاست میں حصہ لینا ہے۔

مسلم لیگ ن کے لندن میں مقیم ناقد شایان علی نے ایک ٹویٹ میں لکھا کہ ’جیسی سب امید کر رہے تھے ویسا ہی ہوا اور جنید صفدر سیاست میں داخل ہو رہے ہیں۔‘

انہوں نے مزید لکھا کہ ’لوگ سیاسی خاندانوں سے اُکتا چکے ہیں۔‘

عبیر خان نامی صارف نے جنید صفدر کی لاہور آمد پر طنز کرتے ہوئے لکھا کہ ’پاکستان مسلم لیگ (ن) کے حامیوں کو مبارکباد۔ مستقبل میں آپ کی پُشتیں شریفوں کی غلام رہیں گی جیسے آپ اور آپ کے والدین ہیں۔‘

پاکستان مسلم لیگ (ن) کی رہنما اور مریم نواز کی قریبی ساتھی حنا پرویز بٹ نے ٹوئٹر پر مخالفین کو جواب دیتے ہوئے کہا کہ ’مریم بی بی کے صاحبزادے جنید صفدر کا فی الحال سیاست میں آنے کا کوئی پلان نہیں۔ اس لیے جھوٹی خبریں پھیلانے سے گریز کیا جائے۔‘

سوشل میڈیا پر قیاس آرئیاں زیادہ بڑھیں تو جنید صفدر نے اپنے سیاست میں آنے یا نہ آنے کے حوالے سے خود وضاحت جاری کی۔

انسٹاگرام پر ایک سٹوری میں جنید صفدر نے لکھا کہ ’میں اپنے والدین، خاندان اور برادری کی خدمت کے لیے پاکستان منتقل ہوا ہوں۔ میں کسی بھی سیاسی سرگرمی میں حصہ نہیں لوں گا اور نہ فی الحال میری سیاست میں کوئی دلچسپی ہے۔‘

انہوں نے اس پوسٹ میں شہر کے موسم کی بھی تعریف کی اور لکھا کہ ’کیا بات ہے لاہور کی ٹھنڈ کی۔ میں نے اسے بہت یاد کیا ہے۔‘

خیال رہے جنید صفدر کے نانا نواز شریف اور والدہ مریم نواز اس وقت لندن میں مقیم ہیں اور ان کی واپسی کے حوالے سے ان کی جماعت کی جانب سے کوئی اعلان نہیں کیا گیا۔