’حج کی خوبصورت تصویر شیئر کریں‘، وزارت کی ٹویٹ پر صارفین پرجوش

’حج موسم کی خوبصورت ترین  تصویر شیئر کریں‘ سعودی وزارت حج و عمرہ کے اس ٹویٹ نے فوٹو گرافروں کے حلقوں میں ہلچل پیدا کر دی۔ 

العربیہ نیٹ کے مطابق وزارت کی یہ ٹویٹ سوشل میڈیا صارفین میں مقبول ہو گئی اور فوٹو گرافروں نے مکہ مکرمہ، منی، مزدلفہ اور عرفات میں  حج  اور حجاج کے خوبصورت مناظر پر مشتمل تصاویر سوشل میڈیا پر شیئر کرنا شروع کردیں۔ انہوں نے حج ادا کرتے ہوئے انتہائی دلکش مناظر پر مشتمل تصاویر سوشل میڈیا پر ڈال کر صارفین کے دل جیت لیے۔ 

وزارت حج و عمرہ نے ٹوئٹر کے اپنے اکاؤنٹ پر تحریر کیا ہے  کہ ’اندرون مملکت سے اس سال حج کا ارادہ کرنے والے سعودی شہریوں اور مقیم غیرملکیوں کی جانب سے حج کی درخواستوں کی وصولی کی شروعات پر حج سیزن کی خوبصورت ترین تصویر شیئر کریں۔‘ 

یاد رہے کہ سعودی وزارت حج و عمرہ نے  5 جنوری 2023 کو اندرون مملکت سے حج کا ارادہ کرنے والے مقامی شہریوں اور مقیم غیرملکیوں سے حج درخواستیں طلب کی تھیں۔ 

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں