ممبئی .... بالی وڈ کے معروف اداکار منوج واجپئی، نیرج پانڈے کو کامیاب اور زبردست فلمساز مانتے ہیں۔ نیرج اور منوج اب گہرے دوست بن گئے ہیں۔ انہوں نے کہا کہ نیرج جیسے ڈائریکٹر فلم انڈسٹری میں کم ہی ہیں۔ انہوں نے مزید کہا کہ نیرج پانڈے کی میں بہت عزت کرتا ہوں۔وہ ایک بے مثال مصنف اور ڈائریکٹر و پروڈیوسر بھی ہیں۔ وہ میرے بہت اچھے دوست بھی بن چکے ہیں۔ ہمار ے تعلقات کا آغاز اس وقت ہوا تھا جب ان کی ’اے ویڈنیس ڈے ‘ فلم ریلیز ہوئی تھی، تب میں نے ان کو فون کیا تھا اور فلم کی تعریف بھی کی تھی اور کام بھی مانگا تھا۔ وہاں سے شروع ہوئی بات اب ڈائریکٹر اور اداکار سے آگے بڑھتے ہوئے دوستی تک آ گئی ہے۔ منوج نے بتایا کہ وہ جلد ہی نیرج پانڈے کی ہدایت میں بننے والی فلم میں سدھارتھ ملہوترا کے ساتھ کام کرتے نظر آئیں گے۔ انہوں نے کہا کہ سدھارتھ ملہوترا آج کا چہرہ ہیں اور انہوں نے جتنی فلمیں کی ہیں ان میں سے زیادہ تر کامیاب رہی ہیں۔ ان کے ساتھ کام کرنے کا تجربہ بہت اچھا رہے گا۔
