بی بی سی نے سپورٹس جرنلسٹ گیری لائنکر کو بحال کر دیا

برطانوی حکومت کی جانب سے ہناہ گزینوں کے لئے نئی پالیسی پر تنقیدی ٹوئٹ کرنے پر بی بی سی سے معطل کئے جانے والے سپورٹس جرنلسٹ گیری لائنکر کو پیر کے روز بحال کر دیا گیا ہے۔

ایسوسی ایٹڈ پریس کے مطابق بی بی سی ٹیلی ویژن نیٹ ورک پر کھیلوں کے پروگرام 'میچ آف دی ڈے' کے میزبان اور سابق فٹبالر کو سیاسی طور پر اپنے اظہار کے لئے معطلی پربراڈکاسٹنگ کارپوریشن کو زبردست عوامی ردعمل کا سامنا کرنا پڑا۔

برٹش براڈکاسٹنگ کارپوریشن کے ڈائریکٹر جنرل ٹم ڈیوی نے کہا ہے کہ گیری لائنکر بی بی سی کی قابل قدر شخصیت ہیں اور میں جانتا ہوں کہ بی بی سی کے لیے گیری کتنے اہم ہیں، میں ان کی آئندہ ہفتے کے پروگرام اور اس میں کوریج پیش کرنے کا منتظر ہوں۔

ڈائریکٹر جنرل کے اس اقدام کے بعد گیری لائنکر نے کہا ہے کہ وہ خوش ہیں کہ ہمیں آگے بڑھنے کا راستہ مل گیا ہے۔

واضح رہے کہ انگلش فٹ بال کے قابل تعریف کھلاڑی  اور براڈکاسٹنگ کارپوریشن کے انتہائی اہم سپورٹس جرنلسٹ گیری لائنکر کو جمعہ کو اس وقت معطل کر دیا گیا تھا جب انہوں نے کشتی کے ذریعے برطانیہ پہنچنے والے تارکین وطن کو حراست میں لینے اور ملک بدر کرنے کے حکومتی منصوبے کو انتہائی ظالمانہ پالیسی کے طور پر ٹوئٹ کیا تھا۔

برطانوی حکومت کی نئی سیاسی پناہ کی پالیسی میں استعمال ہونے والی زبان کا 1930 کی دہائی کی جرمن پالیسی سے موازنہ کرنے پر قدامت پسند سیاست دانوں نے گیری لائنکر کے ٹوئٹ کو تنقید کا نشانہ بنایا ہے۔

سیاستدانوں کے لائنکر کے نازی موازنہ کو جارحانہ اور ناقابل قبول قرار دیا اور کچھ قانون سازوں نے کہا ہے کہ بی بی سی کو ان سے اپنا معاہدہ ختم کرنا چاہیے۔

بی بی سی کی جانب سے کہا گیا ہے کہ اس ٹویٹ نے ان کے غیر جانبداری کے اصولوں کی خلاف ورزی کی ہے جب کہ دوسری جانب ناقدین نے اس پر آزادی اظہار کو دبانے کا الزام لگایا ہے۔

مبصرین، تجزیہ کاروں اور پریمیئر لیگ کے کھلاڑیوں کی جانب سے گیری لائنکر کی حمایت میں کسی شو پر آنے سے انکار کے بعد بی بی سی کو اپنے ویک اینڈ سپورٹس پروگرام کو ختم کرنے پر مجبور ہونا پڑا۔

گیری لائنکر کے 90 منٹ کے معروف ساکر شو 'میچ آف دی ڈے' کو معمول سے ہٹ کر بغیر کسی تبصرے کے کھیلوں کی جھلکیاں اور کلپس دکھا کر20 منٹ تک کرنا پڑا۔

 ڈائریکٹر جنرل ٹم ڈیوی نےکہا ہے کہ بی بی سی نے گیری لائنکر کو معطل کرکے 'صحیح کام کیا ہے' لیکن اب رہنما اصولوں پر نظرثانی کرتے ہوئے بی بی سی کے سوشل میڈیا قوانین کا آزادانہ جائزہ لیا جائے گا۔

ڈائریکٹر جنرل نے مزید کہا کہ ابھی اس بارے میں مزید جائزہ رپورٹیں آئیں گی اور گیری لائنکر کو ادارتی ہدایات کی پابندی کرنا ہو گی۔

انہوں نے کہا کہ 100 سال پرانی بی بی سی براڈکاسٹنگ کارپوریشن کا فرض ہے کہ وہ اپنی خبروں کی کوریج میں غیر جانبدار رہے جب کہ بی بی سی نیوز کے عملے کو سیاسی رائے کے اظہار سے روک دیا گیا ہے۔