برطانیہ کی بادشاہت کا تاج شاہ چارلس سوم کے سر سج گیا

شاہ چارلس سوم تاریخی کنگ ایڈورڈ تاج پہننے والے برطانیہ کے ساتویں بادشاہ بن گئے ہیں۔ شاہ چارلس سوم کی تاج پوشی کی تقریب لندن کے شاہی چرچ ویسٹ منسٹر ایبی میں منعقد ہوئی۔

سنیچر کو ویسٹ منسٹر ایبی میں جاری تقریب میں شاہ چارلس سوم کی اہلیہ ملکہ کمیلا کی تاج پوشی بھی کی گئی۔

تاج پوشی کی تقریب کی تیاریاں کئی روز سے جاری تھیں اور بڑی تعداد میں دنیا بھر سے بڑی تعداد میں ایسے سیاح بھی لندن پہنچے ہیں جو تقریب کو براہ راست دیکھنے کے خواہش مند ہیں۔

شاہ چارلس سوم گذشتہ برس ستمبر میں ملکہ الزبتھ کے انتقال کے بعد بادشاہ بنے تھے۔ 

تاجپوشی کی روایت

تاجپوشی کی یہ روایت 1066 میں شروع ہوئی تھی جس کا سلسلہ جاری ہے اور آج شاہ چارلس سوم 40 ویں بادشاہ کا تاج اپنے سر پر سجایا۔

آج تاجپوشی کے حوالے بننے والی تقریباً ایک ہزار سال پرانی رسوم پر عمل کیا گیا۔

جلوس روانہ ہو گیا

بکنگھم پیلس سے ویسٹ منسٹر ایبی تک جلوس کے ساتھ تقریب کا آغاز ہوا۔ جس روٹ سے یہ جلوس گزرا اس کے ساتھ موجود راستے صبح چھ بجے سے کھول دیے گئے تھے جہاں سے لوگ جلوس کا نظارہ کر رہے تھے۔

جلوس برطانیہ کے وقت کے مطابق صبح 10 بج کر 20 منٹ پر روانہ ہوا جو دی مال اور ٹریفیلگر سکوائر سے ہوتا ہوا وائٹ ہال اور پارلیمنٹ سے گزرا اور براڈ سینکچوری کی طرف مڑ کر ویسٹ منسٹر ایبی تک پہنچا۔

شاہ چارلس اور ملکہ کمیلا جلوس کے دوران خصوصی بگھی جس کا نام ’ڈائمنڈ جوبلی سٹیٹ کوچ‘ ہے، میں سفر کر رہے تھے۔

چند روز پیشتر ہی تاج پوشی کے لیے تاریخی شاہی سٹون آف ڈیسٹنی کو سکاٹ لینڈ سے لندن منتقل کر دیا گیا تھا۔ یہ پتھر برطانوی بادشاہت کے لیے مقدس سمجھا جاتا ہے اور یہ نویں صدی سے برطانوی اور سکاٹش بادشاہوں کی تاج پوشی کے لیے استعمال ہوتا آرہا ہے۔

تقریب کے موقع پر شاہ چارلس سوم جو روایتی شاہی لباس زیب تن کر رکھا تھا اس کی تصاویر چند روز پیشتر چند روز قبل سامنے آئی تھیں جس کو تھرون روم میں رکھا گیا تھا جبکہ جس کرسی پر شاہ چارلس سوم بیٹھے اس کی بھی خصوصی طور پر تزئین و آرائش کی گئی تھی۔

تاجپوشی کی تقریب سے متعلقہ اشیا بھی چند روز قبل ہی بازار میں فروخت ہونا شروع ہو گئی تھیں جن میں روایتی کے ساتھ ساتھ بعض نئی چیزوں کے ماڈل بھی شامل تھے اور ان کی بڑی تعداد میں سیاح خرید رہے تھے۔

تقریباً دو ہفتے قبل ریجنٹ سٹریٹ سمیت لندن کے دوسرے علاقوں میں برطانوی پرچم لگا دیے گئے تھے۔

بکھنگم پیلس کے اردگرد کئی روز سے لوگوں کے جمع ہونے کا سلسلہ بھی جاری تھا جبکہ جس روٹ پر سے جلوس گزرا وہاں بھی سیاح اور برطانیہ کے مقامی افراد نے ڈیرے ڈال رکھے تھے۔

وزیراعظم شہباز تقریب میں شریک

پاکستان کے وزیراعظم شہباز شریف بھی شاہ چارلس سوم کی تاجپوشی کی تقریب میں شریک تھے۔ وہ چار مئی کو لندن پہنچے تھے۔ برطانیہ کے شاہی خاندان کی جانب سے دنیا بھر سے درجنوں رہنماؤں کو شرکت کی دعوت دی گئی تھی۔

حکومت پاکستان کے مطابق لندن پہنچنے پر برطانونی وزیر خارجہ کے خصوصی نمائندے ڈیوڈ گورڈن میک لیوڈ اور پاکسانی ہائی کمشنر معظم احمد خان نے ان کا استقبال کیا تھا۔

شہباز شریف تقریب میں آنے دیگر سربراہان مملکت سے بھی ملاقاتیں کیں۔

لندن سے روانگی سے قبل شہباز شریف کا کہنا تھا کہ ’اس دورے سے پاکستان اور برطانیہ کے کثیرالجہتی تعلقات مزید مضبوط ہوں گے۔‘

’برطانیہ کا شاہی خاندان ہمیشہ سے پاکستان کا عظیم دوست رہا ہے۔‘

وفاقی وزیر اطلاعات مریم نواز نے کہا کہ شہباز شریف نے شاہ چارلس سوم سے ملاقات بھی کی ہے۔‘

انہوں نے نے ٹویٹ میں وزیراعظم اور شاہ چارلس کے مصافحے کی تصویر شیئر کرتے ہوئے لکھا کہ ’وزیراعظم نے شاہ چارلس کو پاکستان کے عوام کی جانب سے مبارک باد پیش کی اور انہیں پاکستان کے دورے کی دعوت بھی دی۔‘

ان کا کہنا تھا کہ ’شاہ چارلس نے شہباز شریف کے ساتھ گفتگو میں اپنے گذشتہ دورہ پاکستان کے حوالے سے اپنی یادداشتوں کا بھی ذکر کیا۔‘

سعودی عرب

سعودی عرب کی جانب سے تقریب میں شرکت کے لیے وزیر مملکت شہزادہ ترکی بن محمد بن فہد جمعے کو لندن پہنچے تھے۔

عرب نیوز کے مطابق ان کا استقبال شاہ چارلس سوم نے خود کیا۔

پرنس ترکی جو شاہ سلمان کے نمائندے ہیں، نے شاہ چارلس کو شاہ سلمان کی جانب سے مبارک باد اور نیک خواہشات کا پیغام بھی پہنچایا جس پر شاہ چارلس نے شاہ سلمان اور ولی عہد محمد بن سلمان کا شکریہ ادا کیا۔

اس موقع پر برطانیہ میں سعودی عرب کے سفیر خالد بن بندر بھی موجود  تھے۔

سعودی عرب میں برطانیہ کے سفیر نیل کرومپٹن کا کہنا ہے کہ ’یہ ایک تاریخ دن ہے اور ہم اپنی تاریخ کے حوالے بہت کچھ سیکھنے جا رہے ہیں۔‘

انہوں نے عرب نیوز کو بتایا کہ ’یہ میری زندگی کی پہلی تاجپوشی کی تقریب ہے۔ میری والدہ کی عمر 87 برس ہے اور وہ اکثر مجھے تاجپوشی کی تقریب کے بارے میں بتایا کرتی تھیں۔‘

نیل کرومٹن نے عرب نیوز کے ہیڈکوارٹرز کا دورہ بھی کیا اور شاہ چارلس سوم کی تاجپوشی کے حوالے منعقدہ تقریب میں کیک بھی کاٹا۔