بارش والے علاقوں کا دورہ، شدید تنقید کے بعد وہاب ریاض نے معافی مانگ لی

لاہور میں ہونے والی ریکارڈ بارشوں کے بعد شہر بھر میں سیلابی صورت حال ہے۔
بارش کے بعد پیدا ہونے والی سیلابی صورت حال کے بعد پنجاب کی نگراں حکومت اور انتظامیہ کی جانب سے اقدامات کرنے کا سلسلہ جاری ہے۔
اسی سلسلے میں بدھ کے روز ٹوئٹر پر نگراں صوبائی وزیر کھیل اور قومی کرکٹ ٹیم کے فاسٹ بولر وہاب ریاض کی ویڈیوز گردش کرتی رہیں جن میں انہیں پانی سے متاثرہ علاقوں کا دورہ کرتے ہوئے دیکھا جا سکتا ہے۔

وہاب ریاض کی ایک وائرل ویڈیو میں انہیں پانی میں گاڑی چلاتے ہوئے دیکھا گیا جس میں گاڑی کی رفتار تیز ہونے کے باعث پانی راہ گیروں اور موٹر سائیکل سواروں پر گرتا دکھائی دیا۔
ایک اور ویڈیو میں انہیں لمبے جُوتے پہنے پانی میں چلتے ہوئے دیکھا گیا جس میں وہ پانی کا معائنہ کر رہے ہیں۔
ان ویڈیوز کے وائرل ہونے کے بعد وہاب ریاض کو ٹوئٹر پر شدید تنقید اور ٹرولنگ کا نشانہ بنایا گیا۔
صارفین کی جانب سے کہا گیا وہاب ریاض نے بارش کے پانی میں تیز رفتار گاڑی چلا کر عام شہریوں کی تضحیک کی ہے اور پانی کے علاقوں کا دورہ کرتے ہوئے ویڈیوز اور تصاویر بنوا کر دکھاوے کا مظاہرہ کیا ہے۔
اپنے اوپر ہونے والی شدید ٹرولنگ اور تنقید کے بعد نگراں وزیر کھیل نے ٹوئٹر پر معافی مانگ لی اور وضاحتی بیان جاری کر دیا۔
وہاب ریاض جمعرات کے روز کہتے ہیں کہ ’سکے کے ہمیشہ دو رُخ ہوتے ہیں لیکن بدقسمتی سے ہم ہمیشہ غلط رُخ دیکھتے ہیں۔‘
’گزشتہ روز جو بھی ہوا، میں اس پر معافی مانگتا ہوں۔ وہ بالکل لاشعوری طور پر ہوا اور اسے غلط تناظر میں لیا گیا۔ آئیں مل کر مثبت باتیں پھیلائیں اور ہمارے اس خوب صورت ملک کو منفی پروپیگنڈا سے خراب نہ کریں۔‘

وہاب ریاض کی اس ٹویٹ کے بعد بھی صارفین کا ردِعمل سامنے آنے کا سلسلہ جاری ہے۔
ارحم نے اپنی ٹویٹ میں لکھا کہ ’بارش میں گاڑی چلا کر آپ نے موٹرسائیکل سواروں کو بھگو دیا، کوئی سکہ نہیں ہے۔ ایک احمقوں والی ٹوپی ہے اور آپ اسے پہنے ہوئے ہیں۔‘

نعمان تسلیم لکھتے ہیں کہ ’انسان لاشعوری طور پر اپنا اندر دکھاتا ہے۔ آپ کے لاشعور میں ہی لوگوں کا مذاق اُڑانا اور ان کی تضحیک شامل ہے لہٰذا گذشتہ روز کی حرکت پر قوم کو بالکل بھی حیرت نہیں ہوئی۔‘

وِرک شاہ زیب نے تبصرہ کیا کہ ’لوگوں پر پانی پھینکنا سکے کا کون سا رُخ ہے؟‘