انڈیا میں شہری کو چار منٹوں میں 38 جوتے مارنے والا پولیس اہلکار معطل

انڈیا کی ریاست اترپردیش میں مبینہ طور پر شراب کے نشے میں دھت شہری پر جوتوں کی بارش کرنے والے پولیس اہلکار کو فوری طور پر ملازمت سے معطل کر دیا گیا ہے۔

این ڈی ٹی وی کے مطابق یہ واقعہ اترپردیش کے دارالحکومت لکھنؤ سے 100 کلومیٹر دور ہردؤئی میں پیش آیا ہے۔ ایک ویڈیو میں سادہ لباس میں ملبوس ایک پولیس اہلکار کو شہری پر جوتے برساتے ہوئے دیکھا جا سکتا ہے۔

شہری کو جوتے مارنے والے پولیس اہلکار کی شناخت دنیش کے نام سے ہوئی جسے چار منٹوں میں 38 جوتے مارنے پر فوری طور پر معطل کر دیا گیا ہے۔

پولیس کے مطابق تشدد کا نشانہ بننے والا شخص شراب کے نشے میں دھت تھا اور مقامی دکان پر لوگوں کو تنگ کر رہا تھا۔

اس حوالے سے ایڈیشنل سپرینٹنڈنٹ پولیس ویسٹ دُرگیش کمار سنگھ نے کہا کہ ’پولیس نے وائرل ہونے والی ویڈیو کا نوٹس لیا ہے۔ پولیس کانسٹیبل سادہ کپڑوں میں مارکیٹ گیا ہوا تھا۔ اس نے وہاں شراب کی نشے میں دھت ایک شخص کو دیکھا جو لوگوں سے بدتمیزی کر رہا تھا۔‘

انہوں نے کہا کہ ’نشے میں دھت شخص نے پولیس اہلکار سے بھی بدتمیزی کی جس کے بعد دونوں میں لڑائی ہو گئی۔ پولیس اہلکار کو فوری طور پر معطل کر دیا گیا ہے۔‘