شہد کی مکھیوں کے ڈنک سے جوڑوں کے درد کا علاج، سعودی خاتون صحت یاب

سعودی عرب کے عسیر ریجن میں شہد کی مکھیوں کی افزائش کرنے والی سعودی خاتون صالحہ الالمعی کا کہنا ہے کہ ’اسے شہد کی مکھیوں سےجوڑوں کے درد ( روماٹیزم) سے نجات مل گئی ہے‘۔ 

العربیہ چینل سے گفتگو کرتے ہوئے سعودی خاتون کا کہنا تھا کہ’ وزارت ماحولیات و زراعت و پانی  کے ماتحت ادارے سے ٹریننگ کورس کیا ہے‘۔

کورس کے دوران بتایا گیا کہ’ شہد کی مکھیوں سے کس طرح نمٹا جاتا ہے اور کیا طریقہ کار اختیار کرکے شہد کی مکھیوں سے زیادہ پیداوار لی جاسکتی ہے۔ اپنے گھر والوں اور اہل عسیر کی بھی اس حوالے سے تربیت کی ہے‘۔ 

صالحہ الالمعی نے بتایا ’وزارت ماحولیات و زراعت  میں کورس کے دوران روماٹیزم کے مرض میں مبتلا تھی۔ ٹریننگ کورس کی انچارج نے شہد کی مکھی کے ڈنک سے میرا علاج کیا‘۔ 

انہوں نے مزید کہا کہ ’ان کے شوہر شہد کے چھتوں کا کاروبار کرتے ہیں۔ ٹریننگ کورس کرنے کے بعد کاروبار میں شریک ہوگئی۔ عسیر کے جنگلات میں شہد کی مکھیوں کے چھتے لگائے۔ کچھ کام ایسے ہیں جو گھروں میں کیے جاسکتے ہیں۔ ان کی ذمہ داری لی جبکہ دیگر کام شوہر کرتے ہیں‘۔ 

صالحہ الالمعی نے کہا کہ ’جو لوگ شہد کے چھتے کے ہنر سے واقف نہیں ہیں وہ سمجھتے ہیں کہ یہ مشکل کام ہے۔ ایسا نہیں ہے۔یہ کام آسانی سے انجام دیا جاسکتا ہے۔ اہم شرط یہ ہے کہ شہد کی مکھیوں سے الرجک نہ ہوں‘۔