مالدیپ کی لگژری ائیرلائنز کا ریاض، میونخ اور زیورخ کے لیے سروس کا اعلان

مالدیپ کی لگژری فضائی سروس بیونڈ ائیرلائنز  نے مالے سے اپنی پروازوں کا سلسلہ سعودی عرب کے دارالحکومت ریاض، میونخ اور زیورخ کے لیے شروع کرنے کا اعلان کیا ہے۔

عرب نیوز کے مطابق لگژری ائیرلائنز نے پریس ریلیز کے ذریعے اعلان کیا ہے کہ بیونڈ کی پہلی پرواز 9 نومبر کو ریاض سے مالدیپ کے لیے روانہ ہوگی جب کہ میونخ اور زیورخ کے لیے 15 اور 17 نومبر سے پروازیں شروع ہوں گی۔

بیونڈ کی چیف کمرشل آفیسر ساشا فیورہرڈ نے بتایا ہے کہ ریاض، میونخ اور زیورخ کے لیے فلائٹس کے آغاز کا اعلان کرتے ہوئے ہمیں بہت خوشی ہو رہی ہے۔

انہوں نے کہا ہے کہ مالدیپ کی خوبصورت تفریحی منزل کے مسافر ائیرلائنز کے پریمیم تجربے سے خوشگوار حیرت کے ساتھ لطف اندوز ہوں گے۔

ائیرلائنز کی ٹیم مسافروں کی توقعات پر پورا اترنے کے لیے فضائی سروس کے آغاز کی تیاری کے آخری مراحل میں ہے اور عمدہ سہولیات فراہم کرنے کے لیے بھرپور محنت کر رہی ہے۔

ساشا فیورہرڈ نے بتایا کہ بیونڈ ائیرلائنز کی بنیاد ایوی ایشن کے تجربہ کار میکس نیلوف اور ٹیرو تسکیلا نے جنوری 2022 میں رکھی تھی

لگژری ائیرلائنز کا منصوبہ معروف انوسٹمنٹ کمپنی عرباسکیو اور مالدیپ کی مہمان نوازی کی کمپنی سمدی گروپ نے مل کر تشکیل دیا ہے۔

بیونڈ ایئر لائن آئندہ پانچ برسوں میں اپنی فضائی سروس میں 30 سے ​​زیادہ طیارے شامل کرے گی جو 25 سے زیادہ ممالک میں 50 سے زیادہ منزلوں کی جانب روانہ ہوگی۔

پریس بیان میں مزید  بتایا گیا ہے کہ بیونڈ نے حال ہی میں مالدیپ سول ایوی ایشن اتھارٹی سے ایئر آپریٹرنگ سسٹم کا سرٹیفکیٹ حاصل کیا ہے۔

لگژری ائیرلائنز نے خصوصی طور پر اپنے مسافروں کے لیے تفریحی شعبے میں پریمیم سفرپر توجہ مرکوز کی ہے، ائیرلائنز کو دیگر فضائی سروس سے ممتاز رکھنے کے لیے اس میں اکانومی کلاس کی سیٹیں نہیں ہیں۔

مالدیپ بحر ہند میں واقع ایشیا کے سب سے زیادہ مطلوب سیاحتی مقامات میں سے ایک ہے۔

اس سیاحتی مقام نے برطانیہ کے فوڈ اینڈ ٹریول میگزین ریڈر ایوارڈز میں گذشتہ سال کی بہترین منزل اور  ورلڈ ٹریول ایوارڈز میں مسلسل تیسرے سال ' دنیا کی معروف منزل' کا ایوارڈ حاصل کیا ہے۔