’پاکستان اور انڈیا کے درمیان ایشیا کپ کا فائنل ادھورا خواب ہی ہے‘

جہاں ایشیا کپ سے باہر ہونے پر پاکستانی شائقین کے جذبات پر زبردست ضرب لگی ہے وہیں سری لنکا کے ہاتھوں شکست کے بعد انڈین فینز کی وہ خوشی بھی ہزاروں سے ضرب کھا گئی ہے جو ان کی ٹیم نے انہیں پاکستان کو ہرا کر دی تھی۔

اس وقت سوشل میڈیا پر ایسا لگ رہا ہے کہ شاید پاکستان کے ہارنے کی اتنی خوشی سری لنکا کو نہیں ہوئی جتنی انڈینز کو ہو رہی ہے۔

جعمرات کو کولمبو میں جاری ایشیا کپ کے سپر فور مرحلے کے اہم ترین میچ میں سری لنکا نے سنسنی خیز مقابلے کے بعد پاکستان کو دو وکٹوں سے ہرا دیا تھا اور یوں پاکستان ایونٹ سے باہر ہوا۔

میچ کا فیصلہ آخری اوور میں آخری گیند پر ہوا۔

آج سوشل میڈیا خصوصاً ایکس (سابقہ ٹوئٹر) پر نگاہ ڈالی جائے تو انڈین شائقین کرکٹ ’ہا ہا‘ اور پاکستان فینز ’ہائے ہائے‘ کی تصویر بنے دکھائی دے رہے ہیں۔

جہاں پاکستانی ٹیم پر طنز کے نشتر برسائے رہے ہیں وہیں کچھ صارفین کرکٹرز کا حوصلہ بڑھاتے ہوئے کچھ ایسے جذبات کا اظہار کر رہے ہیں۔ ’تم جیتو یا ہارو ہمیں تم سے پیار ہے۔‘

سدھا میمر کی جانب سے ایک ایسی ویڈیو شیئر کی گئی جو شاید کسی فلم کا منظر ہے اور ساتھ لکھا گیا کہ ’انڈنینز پاکستان کے کرکٹ فینز کو دیکھتے ہوئے۔‘

ویڈیو میں ایک ایسا مجمع دکھائی دے رہا ہے جس میں بہت سارے لوگ رو رہے ہیں جبکہ ایک نوجوان پہلے سب کو حیرت سے دیکھتا ہے اور پھر دھیرے دھیرے ہنسنا شروع کر دیتا ہے۔‘

دوسری جانب میاں عمر پاکستانی ٹیم کا حوصلہ بڑھاتے ہوئے دکھائی دیے۔ انہوں نے زمان خان کی ایسی غمزدہ تصویر شیئر کی جس میں انہوں نے زمین پر سر رکھا ہوا ہے۔ ساتھ لکھا کہ ’سر اٹھائیے زمان خان، آپ اپنی پوری کوشش کی۔ ہمیں آپ پر فخر ہے۔‘

چونکہ کیپشن میں گرامر کی غلطی تھی جو فوراً ایل ڈی نے پکڑ لی اور ساتھ طنزیہ طور پر لکھا کہ ’آف کورس ہی ٹرائیڈ یوور بیسٹ‘

اسی طرح محسن وانی نے بھی ایک طنزیہ ویڈیو شیئر کی جس میں وہ ٹوپی پہنے پاکستانی ٹیم کی شرٹ کو تہہ لگا کر الماری میں رکھ رہے ہیں اور ساتھ لکھا کہ ’تم نے ہمارا سکون برباد کر دیا۔‘

سپورٹس 360 نام کے ہینڈل سے ایک ایسی ایڈیٹڈ تصویر شیئر کی گئی جس میں بابراعظم دروازے کے باہر،  جس کے اوپر ’کلوزڈ‘ لکھا ہوا ہے، جبکہ انڈین اور سری لنکن کھلاڑی اندر کھڑے ہیں اور ایک وہاں ایشیا کپ بھی پڑا ہوا ہے۔

اس کے ساتھ لکھا کہ ’سری لنکا نے پاکستان کو باہر نکال کر دروازہ بند کر دیا ہے۔‘

سپورٹس 360 نے ایک ایسے فریم کی تصویر بھی کی جس میں بابر اعظم روہت شرما کرسیوں پر بیٹھے ہیں اور درمیان میں میز پر ایشیا کپ کی ٹرافی پڑی ہے تاہم فریم کا شیشہ ٹوٹا ہوا ہے اور اس میں واضح دراڑیں نظر آ رہی ہیں۔

کپیشن میں لکھا گیا ہے کہ ’پاکستان اور انڈیا کے درمیان ایشیا کپ کے فائنل کا خواب ادھورا ہی رہ گیا۔‘

خیال رہے پاکستان کے ایشیا کپ سے باہر ہونے کے بعد فائنل انڈیا اور سری لنکا کے درمیان اتوار 17 ستمبر کو ہوگا۔