شہباز شریف کی لندن ’روانگی‘، نواز شریف کے لیے ’اہم پیغام‘ کی بازگشت

پاکستان مسلم لیگ (ن) کے صدر اور سابق وزیراعظم منگل کو تقریباً ایک ماہ گزار کر لندن سے واپس آئے ہیں اور پاکستانی میڈیا میں گردش کرنے والی اطلاعات کے مطابق وہ جمعرات کو دوبارہ اپنے بھائی نواز شریف سے ملاقات کے لیے روانہ ہوجائیں گے۔

اسی دوران یہ خبریں بھی سامنے آ رہی ہیں کہ سابق وزیراعظم نواز شریف کی صاحبزادی بھی اپنے والد سے ملاقات کے لیے لندن روانہ ہو رہی ہیں۔

خیال رہے کچھ ہفتوں قبل شہباز شریف لندن میں خود یہ اعلان کر چکے ہیں کہ ان کے بڑے بھائی 21 اکتوبر کو پاکستان واپس آ رہے ہیں۔

شہباز شریف کی دوبارہ لندن روانگی کے سبب میڈیا اور سوشل میڈیا پر بھی افواہوں کا بازار گرم ہو چکا ہے۔

پاکستان میں سینیئر تجزیہ کاروں کا یہ خیال ہے کہ شہباز شریف کی لندن روانگی کا سبب دو دن قبل جاری کیا گیا نواز شریف کا ایک بیان ہے جس میں انہوں نے کہا تھا کہ اُن کو وزیراعظم کے عہدے سے ہٹانے کا حکم دینے والے چار ججوں کے پیچھے ’جنرل ریٹائرڈ قمر باجوہ اور جنرل ریٹائرڈ فیض حمید تھے۔‘

سینیئر صحافی نصرت جاوید نے اپنے پروگرام میں دعویٰ کیا کہ شہاز شریف کے ذریعے نواز شریف کو یہ بیان بھجوایا جا رہا ہے کہ وہ ’اینٹی اسٹیبلشمنٹ‘ بیانیہ بنانے سے گریز کریں۔

سوشل میڈیا پر بھی صارفین اس حوالے سے باتیں کرتے ہوئے نظر آ رہے ہیں۔

سردار نعمان نامی صارف نے لکھا کہ ’احتساب (جنرل ریٹائرڈ قمر) باجوہ و (لیفٹیننٹ جنرل ریٹائرڈ) فیض اور (سابق چیف جسٹس) ثاقب نثار کا ہونے کی بات ہوتی ہے اور دوڑیں شہباز شریف کی لگ جاتی ہیں، ایسا کیوں ہوتا ہے؟‘

سلمان حیدر نے شہباز شریف کی لندن روانگی پر لکھا کہ پاکستان مسلم لیگ (ن) کے ’بیانیے میں تبدیلی کا امکان‘ ہے۔

کچھ صارفین کا یہ بھی کہنا ہے کہ سابق وزیراعظم شہباز شریف لندن اپنے بھائی نواز شریف کی پاکستان آمد کی حکمت عملی تشکیل دینے لندن روانہ ہو رہے ہیں اور مریم نواز کا متوقع دورہ بھی اسی سلسلے کی کڑی ہے۔

اکبر باجوہ نے نواز شریف کے لیے ’اہم پیغام‘ کا حوالہ دیتے ہوئے لکھا کہ ’ویسے اہم پیغام مطلب کا نہ ہوا تو کیا واپسی کی تاریخ بدل بھی سکتی ہے؟‘

پاکستان مسلم لیگ (ن) کی جانب سے شہباز شریف کی لندن روانگی کی تصدیق کردی گئی ہے۔

پارٹی رہنما مریم اورنگزیب نے ایک ٹویٹ میں لکھا کہ ’پاکستان مسلم لیگ (ن) کے صدر جناب شہباز شریف پارٹی قائد محمد نواز شریف کے بلانے پر اہم مشاورت کے لئے کل لندن روانہ ہوں گے جس کے بعد وہ جلد وطن واپس آئیں گے۔‘