’کوئی بھی اس درد سے نہ گزرے،‘ آسٹریلین ٹیم فواد احمد کے غم میں شریک

انڈیا میں جاری ورلڈ کپ میں آسٹریلیا کی ٹیم کے کھلاڑی نیدرلینڈز کے خلاف میچ بازو پر سیاہ پٹیاں باندھ کر کھیل رہے ہیں جس کا مقصد پاکستانی نژاد سابق آسٹریلوی سپنر فواد احمد سے ان کے بیٹے کی موت پر یکجہتی کا اظہار کرنا ہے۔

واضح رہے پیر کو پاکستانی نژاد سابق آسٹریلوی لیگ سپنر فواد احمد نے سوشل میڈیا پر ایک پوسٹ میں اپنے شیرخوار بیٹے کی موت کی خبر شیئر کی تھی۔

انہوں نے اپنی سوشل میڈیا پوسٹ میں لکھا تھا کہ ’بدقسمتی سے ایک لمبی جدوجہد کے بعد میرا بیٹا ایک تکلیف دہ اور سخت جنگ ہار گیا ہے۔ مجھے امید ہے کہ اب آپ ایک بہتر جگہ ہیں اور ہم آپ کو بہت یاد کریں گے۔‘

انہوں نے صارفین سے دعاؤں کی درخواست کرتے ہوئے لکھا کہ ’امید کرتا ہوں کہ کوئی بھی اس درد سے نہ گزرے۔‘

بدھ کو جب آسٹریلیا کے کھلاڑی نیدرلینڈز کے خلاف دہلی میں اپنا میچ کھیلنے اُترے تو ان کے بازؤں پر سیاہ پٹیاں بندھی ہوئیں تھیں۔

کرکٹ پر رپورٹنگ کرنے والی آسٹریلین ویب سائٹ کے مطابق آسٹریلین کھلاڑیوں کا سیاہ پٹیاں باندھنے کا مقصد فواد احمد اور ان کے خاندان سے یکجہتی کا اظہار کرنا ہے۔

اس سے قبل کرکٹ آسٹریلیا نے اس حوالے سے ایک بیان میں فواد احمد، ان کے خاندان اور دوستوں سے تعزیت کا اظہار کیا تھا۔

فواد احمد تین ون ڈے اور دو ٹی20 میچز میں آسٹریلیا کی نمائندگی کر چکے ہیں اور ان کی کُل انٹرنیشنل وکٹوں کی تعداد چھ ہے۔

فواد احمد پاکستان سُپر لیگ (پی ایس ایل) میں اسلام آباد یونائیٹڈ اور لاہور قلندرز کی نمائندگی بھی کرچکے ہیں۔