سعودی شہری نے اصطبل کو معذوروں کے لیے بحالی مرکز میں تبدیل کر دیا  

سعودی شہری نواف العرادی نے مشرقی ریجن میں واقع گھوڑوں کے اصطبل کے ایک حصے میں آٹسٹک مریضوں اور معذور افراد کے لیے بحالی مرکز قائم کیا ہے۔ 

العربیہ چینل کے مطابق سعودی شہری نے بتایا کہ’ آٹسٹک مریضوں اور معذور افراد کا بحالی مرکز 2016 سے کام کر رہا ہے۔ اب تک 370 سے زیادہ  آٹسٹک مریضوں اور معذور افراد کو سہولتیں مہیا کی جا چکی ہیں۔‘

بحالی مرکز کی ماہر فاطمہ الطوال نے بتایا کہ ’یہ مرکز معذوروں کے لیے مختص ہے۔ ہر مریض کا خیر مقدم کیا جاتا ہے تاہم کچھ کیسز مستثنیٰ ہیں۔‘

فاطمہ الطوال کا کہنا تھا کہ ’میڈیکل رپورٹ کی بنیاد پر یہ طے کیا جاتا ہے کہ معذور شخص کو بحالی مرکز میں خدمات مہیا کی جا سکتی ہیں یا نہیں۔‘

انہوں نے مزید کہا کہ ’بحالی مرکز کی نمایاں ترین خدمات کے طور پر ایک ایسے بچے کو بطور مثال پیش کیا جا سکتا ہے جو یہاں آنے پر بات چیت نہیں کرسکتا تھا۔ سوال کا جواب نہیں دے پاتا تھا۔ اب وہ گفتگو کرتا ہے اور بہت سی مہارتیں سیکھ چکا ہے۔‘