نیپال میں زلزلہ متاثرین کے لیے امدادی سرگرمیاں جاری

نیپال کے شمال مغربی پہاڑی علاقے میں ہفتے کی صبح  آنے والے شدید زلزلے کی وجہ سے کئی دیہات میں امدادی کارروائیاں جاری ہیں۔

امریکہ کی نیوز ایجنسی ایسوسی ایٹڈ پریس کے مطابق  ریکٹر سکیل پر زلزلے کی شدت 5.6 ریکارڈ کی گئی جس میں 157 افراد ہلاک، سیکڑوں زخمی اور ہزاروں بے گھر ہو گئے۔​

امریکی جیولوجیکل سروے کی تحقیق میں بتایا گیا ہے کہ شدید قسم کا زلزلہ زمین کی سطح سے11 میل (18 کلومیٹر) گہرائی میں آیا۔

نیپال کے نیشنل زلزلہ ریسرچ سنٹر نے تصدیق کی ہے کہ زلزلے کا مرکز دارالحکومت کھٹمنڈو سے تقریباً 400 کلومیٹر  شمال مشرق میں جاجر کوٹ کا علاقہ تھا۔

حکام  کی جانب سے دور دراز کے دیہات میں خوراک و دیگر امدادی سامان کے علاوہ خیمے اور ادویات پہنچانے کی کوششوں پر زور دیا جا رہا ہے۔

زلزلے کے باعث پہاڑی علاقے میں لینڈ سلائیڈنگ سے سڑکیں بند ہوگئیں اور متاثرہ علاقے میں پیدل ہی پہنچا جا سکتا ہے تاہم فوج کی جانب سے سڑکیں کھولنے کی کوشش کی جا رہی ہیں۔

متاثرہ علاقے میں ریسکیو اور سرچ ٹیموں نے بتایا ہے کہ پیر کو  ان کے مشن کا پہلا حصہ مکمل ہو گیا ہے، جس میں زندہ بچنے والوں کو نکالنا، زخمیوں کو علاج کے لیے پہنچانا اور لاشوں کی تلاش شامل تھا۔

کھٹمنڈو کے سرکاری اہلکار ہریش چندر شرما نے  بتایا ہے کہ اب ہم اپنے مشن کے  دوسرے مرحلے پر کام کر رہے ہیں جس میں امدادی سامان کی تقسیم اور دیہاتیوں کی مدد کی جا رہی ہے۔

ہریش چندر شرما نے بتایا کہ زلزلے سے ہونے والے نقصانات کے بارے میں مکمل تفصیلات جمع کی جا رہی ہیں۔

کھٹمنڈو میں نیشنل ایمرجنسی آپریشن سینٹر کی جانب سے جاری کردہ تفصیلات کے مطابق اب تک 157 افراد کی ہلاکتیں اور 256 افراد زخمی اور3891مکانات کو نقصان پہنچا ہے۔