امریکہ اور برطانیہ کے سفارت کاروں کی پاکستان کی سیاسی قیادت سے ملاقاتیں

امریکہ اور برطانیہ کے سفارت کاروں نے سنیچر کو پاکستان کی بڑی سیاسی جماعتوں کے سربراہان سے ملاقاتیں کی ہیں۔

پاکستان میں امریکی سفیر ڈونلڈ بلوم نے لاہور میں سابق وزیراعظم اور مسلم لیگ ن کے قائد نواز شریف سے ان کی رہائش گاہ پر ملاقات کی۔

سنیچر کو مسلم لیگ ن کی جانب سے جاری ایک بیان میں کہا گیا کہ ملاقات کے دوران سابق وزیراعظم نواز شریف اور امریکی سفیر ڈونلڈ بلوم نے پاکستان کی سیاسی و معاشی صورتحال اور خاص طور پر عام انتخابات کی تیاریوں کے حوالے سے تبادلہ خیال کیا۔

ملاقات میں مسلم لیگ ن کی چیف آرگنائزر مریم نواز، سابق وزیر خزانہ اسحاق ڈار اور دیگر رہنما بھی موجود تھے۔

ملاقات میں امریکی سفیر اور نواز شریف نے تجارت، معیشت، موسمیاتی تبدیلیوں، سلامتی اور علاقائی استحکام سمیت دوطرفہ دلچسپی کے مختلف موضوعات پر بھی بات چیت کی۔

دوسری جانب امریکی سفارت خانے کی جانب سے جاری ہونے والے بیان میں کہا گیا ہے کہ ’پاکستانی سیاستدانوں سے جاری ملاقاتوں کے سلسلے میں امریکی سفیر برائے پاکستان ڈونلڈ بلوم نے ملتان میں سابق وزیراعظم یوسف رضا گیلانی کے استقبالیے میں شرکت کی جہاں انہوں نے مختکف سیاسی جماعتوں کے رہنماؤں سے ملاقات کی۔‘

’امریکی سفیر نے لاہور میں سابق وزیراعظم نواز شریف اور استحکام پاکستان پارٹی کے بانی جہانگیر ترین سے بھی ملاقاتیں کیں۔ انہوں نے پاکستان میں آزادانہ اور شفاف انتخابات اور عوام کے اپنے مستقبل کے رہنماؤں کے انتخاب کے حق کی اہمیت پر بات کی۔ انہوں نے امریکہ اور پاکستان کے تجارت اور سرمایہ کاری کے حوالے سے تعلقات پر تبادلہ خیال کیا۔ اس کے علاوہ امریکہ اور پاکستان کے ’گرین الائنس‘ فریم ورک پر پیشرفت کے حوالے سے بھی بات ہوئی۔‘

مسلم لیگ ن کی جانب سے جاری کردہ بیان کے مطابق ملاقات میں امریکی سفیر اور نواز شریف نے تجارت، معیشت، موسمیاتی تبدیلیوں، سلامتی اور علاقائی استحکام سمیت دوطرفہ دلچسپی کے مختلف موضوعات پر بھی بات چیت کی۔

سابق وزیراعظم نواز شریف نے پاکستان اور امریکہ کے درمیان تعلقات کی اہمیت پر زور دیا۔

’قائد مسلم لیگ ن نے خاص طور پر مختلف امریکی رہنماﺅں سے اپنی ملاقاتوں کا حوالہ دیتے ہوئے کہا کہ تمام امریکی رہنما پاکستان اور امریکہ کے درمیان تعلقات کی اہمیت کو تسلیم کرتے ہیں۔‘

ملاقات میں پاکستان اور امریکہ کے درمیان دوطرفہ تعلقات اور مختلف شعبوں میں تعاون پر بھی گفتگو ہوئی۔  

بیان کے مطابق نواز شریف نے کہا کہ ’آج پاکستان کو درپیش لاتعداد مسائل اور بحرانوں سے نکلنے میں پاکستان کے عوام ایک بار پھر پاکستان مسلم لیگ (ن) پر اعتماد کریں گے۔‘

سابق وزیراعظم نے غزہ میں فوری جنگ بندی پر زور دیا۔

’انہوں نے لڑائی اور ہلاکتوں کا سلسلہ فوری روکنے کا مطالبہ کیا اور متاثرہ عوام کو فی الفور طبی اور انسانی امداد کی فراہمی پر بھی زور دیا۔‘

دو دن قبل نواز شریف سے برطانوی ہائی کمشنر جین میریٹ نے بھی ملاقات کی تھی۔

آصف علی زرداری کی برطانوی ہائی کمشنر سے ملاقات

پاکستان پیپلز پارٹی پارلیمنٹرینز کے صدر آصف علی زرداری نے سنیچر کو کراچی میں برطانوی ہائی کمشنر جین میریٹ سے ملاقات کی۔

پاکستان پیپلز پارٹی پارلیمنٹرینز کی جانب سے جاری ہونے والے بیان کے مطابق سابق صدر پاکستان آصف علی زرداری نے شاہ چارلس کی سالگرہ کے حوالے سے اظہار مسرت کا پیغام دیا۔

انہوں نے ڈیوڈ کیمرون کے وزیر خارجہ بننے پر بھی نیک تمناؤں کا اظہار کیا۔

بیان کے مطابق آصف علی زرداری نے غزہ میں اسرائیلی جارحیت کے خاتمے کے لیے برطانیہ سے مصالحتی کردار ادا کرنے پر زور دیا۔ ان کے اور برطانوی ہائی کمشنر جین میریٹ کے درمیان دوطرفہ تعلقات کے فروغ پر بھی بات چیت ہوئی۔

ملاقات کے دوران سینیٹر سلیم مانڈوی والا اور ڈاکٹر عاصم بھی موجود تھے۔