اسرائیلی فوج کے ساتھ ڈکیتی، ہزاروں ڈالر کا اسلحہ چوری

اسرائیلی فوج کے ساتھ ڈکیتی کا ایک واقعہ پیش آیا جب نامعلوم افراد ان سے امریکی ساختہ ایم 16 رائفل میں استعمال ہونے والی گولیاں چوری کر کے لے گئے۔

العربیہ ڈاٹ نیٹ کے مطابق گزشتہ ہفتے پیش آنے والے اس واقعے میں نا معلوم افراد 5.56 ایم ایم کی 20 ہزار گولیاں لے اڑے جن کی مجموعی قیمت 60 ہزار ڈالر سے زیادہ بتائی گئی ہے۔

یہ سامان ڈبوں میں پیک کر کے ایک ٹرک پر لادا گیا تھا جسے صحرائے نقب میں واقع ’تسلیم‘ فوجی اڈے پر لے جانا تھا۔

مقامی میڈیا میں رپورٹ ہونے والی تفصیلات کے مطابق یہ ٹرک اڈے سے چار کلو میٹر دور ایک ٹریفکل سگنل پر رکا جہاں یہ چوروں کے ہاتھ لگ گیا۔

عوامی نگرانی کے کیمروں اور فوجی نقل و حمل کے باوجود چور ’تسلیم‘ اڈے کے قریب سے ڈکیتی کی کارروائی میں کامیاب ہو گئے۔

اسرائیلی فوج اسے زمینی افواج کی تربیت کا سب سے بڑا اڈہ قرار دیتی ہے۔

جنوبی اسرائیل میں فوج کے کمانڈر امیر کوہن نے اس واقعے کی تحقیقیات کے لیے ایک انکوائری کمیشن بنانے کا حکم دیا ہے جو دیگر سکیورٹی اداروں کے ساتھ مل کر حقیقت کا پتا چلانے کی کوشش کرے گا۔

خیال رہے کہ اس علاقے میں چوری اور ڈکیتی کی وارداتیں نئی بات نہیں بلکہ پہلے بھی ہوچکی ہیں۔

گذشتہ برس تسلیم فوجی اڈے سے بندوق کی 26 ہزار گولیوں کی چوری کا اس وقت پتا چلا تھا جب دو فوجیوں کو اس واردات کے شبے میں گرفتار کیا گیا۔