’پتھروں پر نقش ماضی‘، زینت امان کی اپنی ہی تصویر کے سامنے سے گزرنے کی ویڈیو وائرل

بالی وُڈ کی عظیم اداکارہ زینت امان کی فوٹو اینڈ ویڈیو شیئرنگ پلیٹ فارم انسٹاگرام پر ایک ویڈیو وائرل ہے جس میں وہ ممبئی کے انٹرنیشنل ائیرپورٹ پر اپنی ہی بنی ہوئی بڑی تصویر (دیوار پر یادگاری پینٹنگ) کے سامنے سے گزر رہی ہیں۔

اتوار کو زینت امان نے اپنی ویڈیو انسٹاگرام پر شیئر کی جس میں انہیں ممبئی انٹرنیشنل ایئرپورٹ پر دیکھا گیا جہاں وہ ٹریولیٹر سے گزر رہی ہیں اور اُن کے بالکل قریب اُن کی بڑی تصویر بنی ہوئی دکھائی دے رہی ہے۔

لیجنڈری اداکارہ نے اپنی پوسٹ میں لکھا کہ ’ماضی پتھروں پر نقش ہے یا دیواروں پر پینٹ کیا گیا ہے۔ اب اسے تبدیل نہیں کر سکتے لیکن آپ مستقبل کو ضرور تبدیل کر سکتے ہیں۔‘

انہوں نے مزید لکھا کہ ’ممبئی کے انٹرنیشنل ایئرپورٹ پر انڈین سنیما کے عظیم فنکاروں کی تصاویر اور اپنی بڑی تصویر کے سامنے سے گزری۔ 2023 میرے لیے بھرپور سال رہا، دیکھتے ہیں 2024 میں کیا ہوتا ہے۔‘

زینت امان نے رواں برس انسٹاگرام پر اپنا ڈیبیو کیا تھا جس کے بعد وہ اپنے مداحوں کو ساتھ گاہے بگاہے اپڈیٹس دیتی رہتی ہیں۔
 

دوسری جانب لیجنڈری اداکارہ نے کچھ ماہ پہلے اپنی 72ویں سالگرہ بھی منائی تھی اور اس پر مداحوں کے نام جذبات سے بھرپور پیغام جاری کیا تھا۔
 

خیال رہے زینت امان کے مداح انہیں 2024 میں اُن کی آنے والی نئی فلم ’بن ٹِکی‘ میں دیکھ سکیں گے۔

فلم کی مرکزی کاسٹ میں زینت امان کے ساتھ شبانہ عظمی اور ابھے دیول شامل ہیں تاہم فلم کی ریلیز کی تاریخ کا اعلان ابھی تک نہیں کیا گیا۔