’صبح شمالی کوریا میں اٹھا‘ انتخابات پر شوبز سٹارز کے تبصرے

پاکستان میں 8 فروری کو ہونے والے عام انتخابات کے نتائج جہاں تاخیر کے باعث متنازع رہے وہیں ملک بھر میں گذشتہ تین دنوں سے عوامی حلقوں میں اس حوالے سے مسلسل بحث کا سلسلہ بھی جاری ہے۔

اسی سلسلے میں جہاں سیاسی پارٹیاں ایک دوسرے پر دھاندلی کے روایتی الزامات لگا رہی ہیں وہیں عوام میں بھی انتخابات کے نتائج تاخیر سے آنے پر تشویش کا اظہار کیا جا رہا ہے۔

اس ساری صورتحال میں پاکستانی شوبز ستارے بھی سوشل میڈیا پر اپنی رائے کا اظہار کر رہے ہیں۔

اس سے قبل 8 فروری کو پاکستانی شوبز ستاروں نے عوام کو ووٹ ڈالنے کی ترغیب دی وہیں پولنگ ختم ہونے کے بعد کئی شوبز ستارے نتائج پر تبصرے بھی کرتے نظر آئے۔

معروف سنگر مصطفیٰ زاہد نے اپنی ٹویٹ میں طنزیہ انداز میں تبصرہ کرتے ہوئے لکھا کہ ’رات کو پاکستان میں سویا، صبح شمالی کوریا میں اٹھا۔‘
 

 اداکار اور سنگر فرحان سعید لکھتے ہیں کہ ’8 کو ڈالے ہوئے ووٹ 9 کو اتنے بڑے ہوگئے کہ اپنے فیصلے خود لینے لگے۔ ووٹ کو عزت دو سے ووٹ کو ذلت دو تک کا سفر کیسے کٹا، پتا نہیں لگا۔‘
 

اداکارہ عفت عمر نے ٹویٹ میں لکھا کہ ’میری ن لیگ کو آخری اور واحد نصیحت یہ ہے کہ عوامی مینڈیٹ کو عزت سے قبول کریں اور اپوزیشن میں بیٹھیں نہیں تو آپ اپنی عزت مزید کھو دیں گے۔ آپ کے سپورٹر آپ کو اب بھی سپورٹ کریں گے اور زیادہ عزت کریں گے۔ اصلی سیاست دان کی طرح کام کریں۔‘
 

گلوکار عاصم اظہر نے اپنی ٹویٹ میں لکھا کہ ’اس بات کی خوشی ہے کہ بالآخر سسٹم پوری طرح سے کھل کر سامنے آگیا ہے۔ انہیں اس بات کی امید نہیں تھی کہ یہ ’کم عقل یوتھ‘ ایسے باہر آئے گی اور ہماری طرح لڑائی کرے گی۔ ان کو لگ رہا تھا کہ ہمیشہ کی طرح یہ (الیکشن) بھی نکل جائے گا۔‘
 

اداکارہ سجل علی نے فوٹو اینڈ ویڈیو شیئرنگ پلیٹ فارم انسٹاگرام پر اپنی سٹوری میں لکھا کہ ’تبدیلیاں تو بہت آ رہی ہیں رات سے ابھی تک۔‘

انہوں نے اپنی دوسری سٹوری میں لکھا کہ ’مگر اچھی خبر یہ ہے کہ آج پورے ملک کو ملک کی فکر ہے۔ لگے رہو، لگے رہو۔‘
 

اداکار فیصل قریشی نے اپنی انسٹاگرام سٹوری میں الیکشن نتائج پر تبصرہ کیا کہ ’اگر میں مورخ ہوتا تو اب تک پاگل ہو چکا ہوتا۔‘