سعودی طلبہ کی ٹیم نے امریکہ میں ’ریجنیرون انٹرنیشنل سائنس اینڈ انجینیئرنگ فیئر‘ (آئی ایس ای ایف 2024) میں مسلسل 18 ویں سال 9 خصوصی ایوارڈ جیتے ہیں۔
امریکی شہر لاس اینجلس میں ہونے والا انٹرنیشنل فیئر 10 سے 18 مئی تک جاری رہے گا۔سعودی طلبہ کنگ عبدالعزیز فاونڈیشن موھبہ اور وزارت تعلیم کی نمائندگی کررہے ہیں۔
ریجنیرون انٹرنیشنل سائنس اینڈ انجینیئرنگ فیئر میں 70 ممالک کے 1700 طلبہ شریک ہیں۔ امریکہ جانے والی ٹیم میں 35 سعودی طلبہ شامل ہیں۔
اخبار 24 کے مطابق سعودی طالب علم جمال اللقمانی نے میٹریل سائنس ، الیاس ماھو خان نے بائیو میڈیسن اور ہیلتھ سائنسز،سعودی طالبہ لیان القرافی نے سافٹ ویئرسسٹمز اور اریج بنت عبداللہ القرنی نے میٹریلز سائنس میں دوخصوصی ایوارڈز حاصل کیے۔
سعودی طالبہ فاطمہ الشخص نے انوائرمنٹیل انجینیئرنگ، لانا المزروعی نے سیلولر اینڈ مالیکولر بائیولوجی، عبیر الیوسف نے کیمسٹری اور طالب علم صالح العنقری نے بھی کیمسٹری میں کامیابی حاصل کرکے اعزاز اپنے نام کیے۔
