عازمین حج کو پہلے سے زیادہ سہولتیں دی جائیں گی: چوہدری سالک

وفاقی وزیر مذہبی امور چوہدری سالک حسین نےعازمین حج کی سہولت کےلیے تمام وسائل بروئے کار لانے کی ہدایت کی ہے۔

پاکستان حج مشن مکہ مکرمہ میں اجلاس کی صدارت کرتے ہوئے ان کا کہنا تھا کہ پاکستان حج مشن عازمین کو سہولتوں کی فراہمی کے حوالے سے مثالی کام کر رہا ہے۔

وزارت سے جاری بیان کے مطابق ڈی جی حج نے عبدالوہاب سومرو نے وفاقی وزیر کو جاری حج آپریشن 2024 سے متعلق بریفنگ دی۔

ڈائریکٹر حج میڈیکل مشن بریگیڈیئر جمیل لاکھیر، ڈائریکٹر معاونین اصغر یوسفزئی اور دیگر افسران اجلاس میں موجود تھے۔

علاوہ ازیں وفاقی وزیر مذہبی امورچوہدری سالک حسین نے مکہ مکرمہ، منیٰ، عرفات اور مزدلفہ کا دورہ کیا اور پاکستانی عازمین کو دی جانے والی سہولتوں کا جائزہ لیا۔

اس موقع پر انہوں نے کہا کہ ’پاکستانی عازمین کو حج کے دوران بہترین سہولتوں کی فراہمی ہماری ترجیح ہے‘۔

  ’عازمین حج کی خدمت عبادت ہے۔عازمین کو پہلے سے زیادہ بہترین سہولتیں دی جائیں گی‘۔

وفاقی وزیر نے منیٰ کے خیموں میں  عازمین کو گرمی سے بچانے کےلیے انتظامات کی بھی ہدایت کی۔ 
 حج مشن اور سعودی حکام نے وفاقی وزیر کو پاکستانی عازمین حج کو دی جانے والی سہولتوں سے متعلق بریفنگ دی۔

حکام نے بتایا’ رواں سال تمام سرکاری عازمین حج کو مشاعر ٹرین کی سہولت دی جائے گی‘۔