جدہ الفیصلیہ میں گرنے والی عمارت کے ملبے سے 8 افراد کو نکال لیا گیا
جدہ الفیصلیہ میں گرنے والی عمارت کے ملبے سے 8 افراد کو نکال لیا گیا
جمعہ 31 مئی 2024 18:05
عمارت کے منہدم ہونے کے والے سے مزید تحقیقات کی جا رہی ہے ( فوٹو: سبق)
سعودی عرب میں جدہ کے علاقے الفیصلیہ میں جمعرات کی شام گرنے والی پانچ منزلہ عمارت کے ملبے سے 8 افراد کو نکال لیا گیا جبکہ مزید افراد کی تلاش کا کام جاری ہے۔
العربیہ کے مطابق متاثرہ عمارت میں 13 فلیٹ تھے جن میں رہنے والے افراد کی مجموعی تعداد کاعلم نہیں ہوسکا۔
ابتدائی اطلاعات کے مطابق عمارت کے تہہ خانے میں مرمت کا کام جاری تھا جس کے باعث عمارت منہدم ہوگئی۔
جائے حادثہ پرموجود عینی شاہدین نے بتایا انہوں نے عمارت گرنے کی تیز آواز سنی اس کے بعد لوگوں کی چیخ و پکار سنائی دی۔ بچوں کے رونے کی آوازیں شامل تھیں۔
ابتدائی اطلاعات کے مطابق عمارت کے تہہ خانے میں مرمت کا کام جاری تھا (فوٹو: العربیہ)
سبق نیوز کے مطابق منہدم ہونے والی عمارت دراصل ایک رہائشی بنگلہ تھا جس پر فلیٹ تعمیر کیے گئے اور اسے پانچ منزلہ عمارت بنا دیا گیا۔
شہری دفاع اور دیگر ادارے عمارت کے منہدم ہونے کے والے سے مزید تحقیقات کررہے ہیں۔
واضح رہے جمعرات کو الفیصلیہ کے علاقے میں رہائشی عمارت کے گرنے کی اطلاع موصول ہونے پر شہری دفاع اور دیگر ادارے کی ٹیمیں جائے وقوعہ پرپہنچ گئیں جنہوں نے امدادی کارروائیوں کا آغاز کر دیا۔
جمعہ کے روز سہ پہر تک عمارت سے 8 افراد کو نکالا جاچکا ہے جنہیں ابتدائی طبی امداد دی گئی۔
