اے وی سی چیلنج کپ سیمی فائنل: پاکستان نے جنوبی کوریا کو 3-1 شکست دے دی
والی بال کی عالمی رینکنگ میں پاکستان کا 49 جبکہ کوریا کا 27واں نمبر ہے(فائل فوٹو: سکرین گریب)
پاکستان کی والی بال ٹیم نے ایشین والی بال کنفیڈریشن چیلنج کپ میں جنوبی کوریا کو تین۔ ایک سے شکست دے کر فائنل کے لیے کوالیفائی کر لیا۔
یہ میچ سنیچر کو بحرین کے دارالحکومت منامہ میں ہوا۔ جنوبی کوریا کو شکست دینے کے بعد اب اتوار کو پاکستان اور قطر فائنل میں مدمقابل ہوں گے۔
اس سے قبل کوارٹر فائنل میں پاکستان نے ویتنام کو شکست دی تھی جبکہ قطر نے قازقستان کو سیمی فائنل میں شکست دی تھی۔
اے وی سی چیلنج کپ کے آج ہونے والے اس سیمی فائنل کے پہلے سیٹ میں پاکستان 25-22 پوائنٹس سے جیت گیا جبکہ دوسرے سیٹ میں جنوبی کوریا نے پاکستان 26-24 پوائنٹس سے ہرا دیا۔
تیسرے سیٹ میں پاکستان نے دوبارہ کم بیک کرتے ہوئے حریف ٹیم 25-22 سے شکست دے دی۔
میچ کا چوتھا اور آخری سیٹ بھی پاکستان 25-22 کے ساتھ اپنے نام پر کر لیا اور یوں پاکستان نے اے وی سی کپ کے فائنل کے لیے کوالیفائی کر لیا۔
والی بال کی عالمی رینکنگ میں پاکستان کا 49 جبکہ کوریا کا 27واں نمبر ہے۔
