کمانڈ اینڈ کنٹرول سینٹر میں حج سکیورٹی کے لیے 8 ہزار کیمرے

کمانڈ اینڈ کنٹرول سینٹر برائے حج سیکیورٹی نے مکہ مکرمہ اور مشاعر مقدسہ (منی، عرفات اور مزدلفہ) میں 8 ہزار کیمرے نصب کیے ہیں جو مصنوعی ذہانت سے لیس ہیں۔

العربیہ چینل کے مطابق انہیں نگرانی کے لیے 500 سے زائد مقامات پر تقسیم کیا گیا ہے جس کا مقصد حج موسم کے دوران سیکیورٹی کو برقرار رکھنا ہے۔ اس کے ذریعے ہجوم، ٹریفک اور ہنگامی مسائل سے نمٹنا ہے۔ اسی طرح دیگر حصوں میں بھی کیمروں کی تنصیب کی گئی ہے جہاں سے عازمین حج کی مختلف جگہوں پر آمد ورفت کی مانیٹرنگ ہوسکے گی جس کے بعد مکہ مکرمہ اورمشاعر مقدسہ کے ہر حصے کی نگرانی آسان ہو جائے گی۔

حج سیکیورٹی فورسز کے ترجمان لیفٹیننٹ کرنل خالد الکریدیس نے العربیہ چینل سے گفتگو کرتے ہوئےکہا کہ کمانڈ  اینڈ کنٹرول سینٹر حج سیکیورٹی فورسز کے منصوبوں کو مکمل کرتا ہے۔

الکریدیس نے  بتایا کہ مرکز نے جدید ترین ٹیکنالوجیز کے حامل کیمروں کی تنصیب کی ہے، عازمین کے ہجوم کو منظم کرنے کے علاوہ ان کیمروں کے ذریعے دیگر کام بھی انجام دیے جا سکیں گے۔ یہ مسجد الحرام میں سکیورٹی آپریشن سینٹر 911 سے بھی براہ راست رابطے میں ہوں گے تاکہ سیکیورٹی مسائل بروقت حل ہوسکیں۔

الکریدیس نے کہا کہ  یہ مرکز کئی جدید تکنیی صلاحیتوں کے حوالے سے ممتاز ہے کیونکہ یہ کیمرے مصنوعی ذہانت کے پروگرام سے لیس ہیں جو سدایا کے تعاون سے استعمال کیے جا رہے ہیں۔ ان کیمروں کی تنصیب سے کمانڈ اینڈ کنٹرول سینٹر کا معیار بہت عمدہ اور اعلی ہو گا اور بروقت تمام معاملات آسانی سے حل ہو سکیں گے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں