سعودی کابینہ کا غزہ میں جنگ بندی کی کوششوں کے لیے سپورٹ کا اعادہ

سعودی کابینہ کے منگل کو ہونے والے اجلاس میں غزہ میں جنگ بندی تک پہچنے کی کوششوں کے لیے سعودی عرب کی سپورٹ کا اعادہ کیا ہے۔

ایس پی اے کے مطابق سعودی کابینہ کا اجلاس منگل کو جدہ میں ولی عہد و وزیراعظم شہزادہ محمد بن سلمان کی زیر صدارت ہوا ہے۔

اجلاس میں فلسطینی سرزمین پر اسرائیلی قبضے کے خاتمے، امن کے حصول اور فلسطینیوں کو ان کے جائز حقوق دینے کے لیے آگے بڑھنے کی ضرورت پر زور دیا گیا۔

کابینہ نے بین الاقوامی فورمز پر عرب پارلیمنٹ کی کوششوں اور تعاون کو بھی سراہا۔ عرب ممالک کے ساتھ تعاون کو مستحکم کرنے کی خواہش کا اعادہ کیا۔

کابینہ نے گزشتہ ہفتے جدہ میں ولی عہد اورعرب پارلیمنٹ کے سپیکر عادل بن عبدالرحمن العسومی کی ملاقات کا بھی جائزہ لیا جس کے دوران ولی عہد کو لیڈرز میڈل دیا گیا۔

 عرب پارلیمنٹ کے سپیکر نے یہ میڈل عرب کاز کی سپورٹ اور مشترکہ عرب اقدام کو مضبوط بنانے میں سعودی ولی عہد کے قائدانہ کردار کی تعریف میں دیا۔

اجلاس نے پائیداری اور ماحولیاتی تحفظ کے شعبے میں عالمی کوششوں کو بڑھانے کے لیے مملکت کی کوششوں کا بھی جائزہ لیا۔

ان کوششوں میں اسٹریٹجک اہداف کے مطابق شاہی ریزرو کی ترقی اور توسیع کے لیے کام کرنا شامل ہے جو جنگلی حیات کے تحفظ ، جنگلات اور ماحولیاتی سیاحت کی سپورٹ پر توجہ مرکوز کرتے ہیں۔

اجلاس میں سعودی وزارت ثقافت اور چینی وزارت ثقافت و سیاحت کے درمیان ثقافتی شعبے میں تعاون،سعودی ٹورازم اتھارٹی اور سوئٹزرلینڈ ٹورازم کے درمیان سیاحت کے شعبے میں تعاون کے لیے مفاہمتی یادداشت کی منظوری دی گئی۔

سعودی وزارت ٹرانسپورٹ، لاجسٹک سروسز او بحرین کی وزارت ورکس، ٹرانسپورٹیشن اور ٹیلی کمیونیکیشنز کے درمین روڈ سیفٹی اور ٹرانسپورٹیشن کے شعبوں میں مفاہمت کی دو یادداشتوں سمیت کئی معاہدوں کی منظوری دی گئی۔