سعودی عرب اور ملائیشیا میں فوجی اور دفاعی تعاون مضبوط بنانے کا جائزہ

سعودی، ملائیشین کوآرڈینیشن کونسل کے تحت ڈیفنس ملٹری کمیٹی کا پہلا اجلاس بدھ کو کوالالمپور میں ہوا ہے۔

ایس پی اے کے مطابق اجلاس کی سربراہی سعودی وزارت دفاع کے انڈر سیکرٹری برائے سٹریٹجک امور میجرجنرل سلمان بن عوض الحربی اور ملائشیا کی وزارت دفاع کے ڈپٹی سیکرٹری جنرل برائے پالیسیز محمد یانی بن داود نے کی۔

ملائیشین وزارت دفاع کے ہیڈ کوارٹر میں ہونے والے اجلاس میں دونوں ملکوں کی وزارت دفاع کے درمیان تعلقات اور تعاون کا جائزہ، انہیں دفاعی اور فوجی سطح پر مضبوط بنانے اور ترقی دینے کے طریقوں کے علاوہ مشترکہ مفادات کے امور پر تبادلہ خیال کیا گیا۔

علاوہ ازیں وزارت دفاع کے انڈر سیکرٹری برائے سٹریٹجک امور نے ملائیشا کی وزارت دفاع کے سیکرٹری جنرل داتوک سیری ہشام بن اسحاق سے ملاقت کی۔

خاص طور پر فوجی اور دفاعی شعبے میں دوطرفہ تعلقات اور تعاون بڑھانے کے طریقوں پر تبادلہ خیال کیا گیا۔

میجر جنرل سلمان بن عوض الحربی نے کوالالمپور اور برونائی میں سعودی ملٹری اتاشی کے دفتر کا بھی دورہ کیا۔