ایف سی کے ہیڈکوارٹر پر حملے کی کوشش ناکام، 4 خودکش بمبار ہلاک: آئی ایس پی آر
آئی ایس پی آر کا کہنا تھا کہ علاقے میں سرچ آپریشن کیا جا رہا ہے (فوٹو: آئی ایس پی آر)
پاکستان کی فوج کے شعبہ تعلقات عامہ (آئی ایس پی آر) نے کہا ہے کہ جمعے کو ضلع مہمند میں فرنٹیئر کور کے ہیڈکوارٹر پر حملے کی کوشش کو ناکام بنایا گیا۔
سنیچر کو آئی ایس پی آر کی جانب سے جاری کی گئی پریس ریلیز میں بتایا گیا ہے کہ چھ ستمبر کو صبح کے وقت خوارج کے ایک گروپ نے ایف سی کے ہیڈکوارٹر پر حملے کی کوشش کی، تاہم سکیورٹی فورسز کے فوری ردعمل سے چار خوارج جو کہ خودکش بمبار تھے، اپنے مقاصد پورے کرنے میں ناکام رہے اور دھماکوں سے قبل ہی ہلاک کر دیے گئے۔
پریس ریلیز کے مطابق علاقے میں کسی بھی خارجی کو ختم کرنے کے لیے آپریشن کیا جا رہا ہے۔
بیان میں یہ بھی کہا گیا ہے کہ پاکستان کی سکیورٹی فورسز ملک سے دہشت گردی کی لعنت کو جڑ سے اکھاڑ پھینکنے کے لیے پرعزم ہیں۔
