جب مسافر کے کھانے سے برآمد ہونے والے چوہے نے جہاز کو لینڈنگ پر مجبور کردیا

ایک مسافر کی کھانے کی ٹرے سے برآمد ہونے والے چوہے نے سکینڈینیوین ایئرلائن کی پرواز کو غیر طے شدہ لینڈنگ پر مجبور کر دیا۔

فرانسیسی نیوز ایجنسی اے ایف پی کے مطابق یہ واقعہ بدھ کو اوسلو سے ملاگا پرواز کے دوران پیش آیا جس کی وجہ سے طیارے کو کوپن ہیگن میں اترنا پڑا۔

ایئر لائنز عام طور پر چوہوں کی جہاز میں موجودگی کی سختی سے روک تھام کرتی ہیں کیونکہ یہ جانور برقی تاروں کو چبا سکتے ہیں جس سے ہوائی جہاز کا آپریشن متاثر ہو سکتا ہے۔

ایک مسافر جارلے بوریسٹاد نے اپنے فیس بک پیج پر لکھا  کہ ’یقین کریں یا نہ کریں۔ میرے ساتھ والی ایک خاتون نے اپنا کھانا کھولا اور ایک چوہا چھلانگ لگا کر باہر نکلا۔‘

ایئرلائن کے ترجمان اوسٹین شمٹ نے اے ایف پی کو بتایا کہ ’ہمارے طریقہ کار کے مطابق ہوائی جہاز میں تبدیلی کی گئی اور مسافروں کو دوسری پرواز سے ملاگا لے جایا گیا۔‘

انہوں نے اس واقعے کے بارے میں کہا کہ ’یہ وہ چیز ہے جو بہت کم ہی ہوتی ہے۔ ہم نے ایسے حالات کے لیے طریقہ کار قائم کیا ہے، جس میں ہمارے سپلائرز کا جائزہ بھی شامل ہے تاکہ یہ یقینی بنایا جا سکے کہ ایسا دوبارہ نہ ہو۔‘