کیری ڈبے کی متبادل پاکستانی سوزوکی ایوری کب لانچ ہوگی اور قیمت کیا؟

پاکستان سوزوکی موٹر کمپنی نے حال ہی میں سوزوکی بولان (کیری ڈبے) کی پیداوار ختم کی ہے جس کی جگہ اب پاکستان میں بننے والی سوزوکی ایوری لانچ کی جائے گی۔ 

ویب سائٹ پاک ویلز کے مطابق پاک سوزوکی کمپنی رواں ماہ  12 اکتوبر کو سوزوکی ایوری کو باقاعدہ لانچ کرنے جا رہی ہے۔ پاک سوزوکی کی جانب سے تاحال حتمی تاریخ کا اعلان سامنے نہیں آیا۔ 

پاکستان میں سوزوکی بولان یا کیری ڈبے کی پیداوار باضابطہ طور پر ختم ہو چکی ہے۔

گذشتہ چند برسوں کے دوران اس گاڑی کے بند ہونے کی افواہیں گردش کر رہی تھیں،لیکن اب یہ بات مکمل طور پر واضح ہو گئی ہے کہ سڑکوں پر کوئی نئی بولان نظر نہیں آئے گی۔

یاد رہے کہ اس سے قبل سوزوکی کمپنی اپنی مہران گاڑی کی پیداوار بھی بند کرچکی ہے۔ یہ دونوں گاڑیاں کم قیمت سپیئر پارٹس اور بہتر فیول ایوریج کی وجہ سے عوام میں بہت مقبول رہی ہیں۔

چند روز قبل سوشل میڈیا پر سوزوکی کمپنی کے پلانٹ کی ایک تصویر وائرل ہوئی جس میں ایک کیری ڈبے پر کام کرتے کارکن اس ماڈل کی آخری گاڑی کو تیار کر رہے تھے اور اس گاڑی کا چیسز نمبر بتاتے ہوئے اسے خیرباد کہہ رہے تھے۔

واضح رہے کہ تین سال قبل سال 2021 میں سوزوکی بولان کے مستقبل کے بارے میں اس وقت شکوک و شبہات پیدا ہوگئے تھے جب لاہور ہائی کورٹ کے فیصلے کے بعد انجینیئرنگ ڈویلپمنٹ بورڈ نے یہ ہدایت کی تھی کہ تمام کار کمپنیاں ایئر بیگز کے ساتھ گاڑیاں اسمبل کریں۔

اس فیصلے کے بعد یہ توقع کی جا رہی تھی کہ کمپنی اس ماڈل کو بند کر دے گی، تاہم سوزوکی نے اس وقت ان افواہوں کی تردید کی تھی۔

سوزوکی ایوری کے فیچرز اور فیول ایوریج کیا ہے؟ 

اب سوزوکی کی جانب سے پاکستان میں بولان کی جگہ ’ایوری ‘ لانچ کی جا رہی ہے۔

سوزوکی بولان کے مقابلے میں ایوری نمایاں طور پر زیادہ جدید اور مضبوط گاڑی معلوم ہوتی ہے۔ 

گاری کے اندرونی حصے میں جدید فیچرز سے لیس ہائی ماونٹڈ ڈیش بورڈ موجود ہوتا ہے۔

اب تک پاکستان میں جتنی بھی سوزوکی ایوری گاڑیاں دستیاب ہیں وہ جاپان کی مینوفیکچرڈ اور امپورٹ ہیں۔ اور جاپان کی مختلف گاڑیوں کی طرح سوزوکی ایوری میں بین الاقوامی معیار کے فیچرز جیسے کہ کلائمیٹ کنٹرول، اے بی ایس، پاور سٹیئرنگ شامل ہوتے ہیں۔

جاپانی سوزوکی ایوری کا انجن 660 سی سی ہوتا ہےجو 49 ہارس پاور اور 62Nm کا ٹارک پیدا کرنے کی صلاحیت رکھتا ہے۔ یہ بنیادی طور پر شہر کی ڈرائیونگ اور لائٹ ڈیوٹی کے کاموں کے لیے ڈیزائن کیا گیا ہے۔

ویسے تو یہ گاڑی ایک ’پاور ہاؤس‘ تصور نہیں کی جاتی مگر یہ روزمرہ کے استعمال اور زیادہ سواریوں اور سامان کی گنجائش رکھنے کے لیے کافی مقبولیت حاصل کر چکی ہے۔ اس وجہ سے پاکستان میں بھی سوزوکی ایوری کو اکثر سکول وینز یا کارکو سروسز میں استعمال ہوتے دیکھا گیا ہے۔ 

950 کلوگرام  وزنی سوزوکی ایوری کو 660 سی سی انجن ویسے تو بہتر انداز میں سنبھال لیتا ہے مگر گاڑیوں میں زیادہ سواریاں بیٹھنے پر گاڑی کچھ ’انڈر پاور‘ محسوس بھی ہوتی ہے۔ 

سوزوکی ایوری کا فیول ٹینک 37 لیٹر ہے۔ اندازے کے مطابق یہ گاڑی شہر میں 19 کلومیٹر فی لیٹر  جبکہ ہائی وے پر 21 کلومیٹر فی لیٹر فیول اکانومی مہیہ کرتی ہے۔ 

پاکستان میں تیار کردہ سوزوکی ایوری کی قیمت کیا ہوگی؟ 

پاک ویلز کے مطابق پاکستان میں تیار کی جانے والی سوزوکی ایوری کی قیمت 26 لاکھ پاکستانی روپے تک ہونے کا امکان ظاہر کیا جا رہا ہے جو کے سوزوکی بولان سے 6 سے 7 لاکھ روپے زیادہ ہے۔