انڈین ریاست منی پور میں پولیس سٹیشن پر حملہ، 10 افراد ہلاک: پولیس

انڈیا کی شمال مشرقی ریاست منی پور میں پولیس نے اپنے سٹیشن پر حملے کے بعد کوکی اقلیتی فورسز کے ساتھ جھڑپ میں کم از کم 10 افراد کو ہلاک کر دیا ہے۔

فرانسیسی خبر رساں ایجنسی اے ایف پی کے مطابق ریاست کے جیریبام ضلع کے ڈپٹی کمشنر کرشنا کمار نے بتایا کہ ’پولیس سٹیشن پر حملے کو ناکام بناتے ہوئے ایک اہلکار زخمی ہوا۔‘

انہوں نے مزید کہا کہ ’اب تک شرپسندوں کی 10 لاشیں برآمد کی جا چکی ہیں۔‘

ہلاک ہونے والوں کا تعلق ہمار گروپ سے ہے جو کوکی برادری کے اندر ایک چھوٹا گروپ ہے۔

گذشتہ ہفتے ضلع میں ایک کوکی خاتون کی جلی ہوئی لاش ملنے کے بعد اس کشیدگی نے جنم لیا۔

اب تک اس کشیدگی کے نتیجے میں کم از کم 200 افراد ہلاک ہو چکے ہیں اور کمیونٹیز ریاست کے مختلف حصوں میں حریف گروپوں میں بٹ گئی ہیں۔

کچھ مہینے پُرسکون گزرنے کے بعد ستمبر میں تشدد میں اضافے کے نتیجے میں کم از کم 11 افراد ہلاک ہوئے تھے۔ اس دوران باغیوں کی جانب سے مبینہ طور پر راکٹ داغے گئے اور ڈرون کے ذریعے بم گرائے گئے۔

میٹی اور کوکی قبیلوں کے درمیان زمین کی ملکیت اور سرکاری ملازمتوں کے حصول کی وجہ سے دیرینہ تنازع ہے۔

گزشتہ برس مئی میں شروع ہونے والے نسلی فسادات میں 200 سے زیادہ افراد ہلاک ہوئے تھے اور ہزاروں بے گھر ہو گئے تھے۔