مسجد الحرام میں عمرہ زائرین نے بارش کے دوران نماز عصر ادا کی

سعودی عرب مکہ مکرمہ میں اتوار کو بارش کی اطلاعات ہیں۔

الاخباریہ چینل کے مطابق مسجد الحرام میں عمرہ زائرین نے بارش کے دوران عصر کی نماز ادا کی، طواف اور عبادت میں مصروف رہے۔ انہوں نے دعائیں بھی کیں۔ 

 بارش کے دوران نماز عصر اور طواف کی تصاویر اور وڈیوز سوشل میڈیا پر وائرل ہیں۔

یاد رہے ماہرین موسمیات نے مکہ مکرمہ، جدہ، اللیث اور القنفذہ میں کہیں تیز اور کہیں گرج چمک کے ساتھ موسلادھار بارش کا امکان ظاہرکیا تھا۔

 سعودی محکمہ موسمیات نے مکہ مکرمہ ریجن کے لیے ریڈ الرٹ جاری کیا ہے۔

بیان میں کہا گیا کہ ’موسلادھار بارش کے باعث سیلابی ریلوں کا امکان ہے۔ غیر یقینی موسمی صورتحال سے مکہ مکرمہ شہر کے علاوہ جدہ، شعیبہ، جموم اور بحرہ سب سے زیادہ متاثر ہوں گے۔‘

واضح رہے حرمین شریفین انتظامیہ نے مسجد الحرام کی خدمت پر مامور متعدد سرکاری اداروں کے تعاون سے مسجد الحرام میں بارش  کے مسائل سے نمٹنے کے لیے ہنگامی سکیموں پر عمل درآمد شروع کررکھا ہے۔

حرمین شریفین انتظامیہ کی کوشش ہے کہ عبادت کے دوران زائرین کی سلامتی کو یقینی بنایا جائے۔

بارش کے دوران مطاف، نماز کے مقامات، داخلی راستوں پر فوری طور پر پانی کی نکاسی اور فرش خشک کیے جانے کو یقینی بنایا جارہا ہے۔