سعودی عرب کے کئی علاقے منگل تک بارش کی زد میں رہیں گے

سعودی محکمہ شہری دفاع نے مملکت کے کئی علاقوں میں سنیچر سے منگل تک گرج چمک کے ساتھ بارش کا الرٹ جاری کیا ہے۔

ایس پی اے کے مطابق شہری دفاع نے بیان میں کہا کہ ’مکہ ریجن میں شدید بارش، ژالہ باری اور تیز ہوائیں چلنے کا امکان ہے۔‘

ریاض، قصیم، حائل، حدود الشمالیہ، الشرقیہ، باحہ اور عسیر کے علاقوں میں درمیانے درجے سے شدید بارش کی پیشگوئی کی گئی ہے جبکہ تبوک، الجوف اور نجران کے علاقے ہلکی سے درمیانے درجے کی بارش کی زد میں رہیں گے۔

 محکمہ شہری دفاع نے بیان میں شہریوں کو احتیاطی تدابیر اختیار کرنے کا مشورہ دیا اور کہا کہ ’خود کو محفوظ مقامات تک محدود رکھیں‘۔

علاوہ ازیں سعودی موسمیات کے قومی مرکز کے تجزیہ کار عقیل العقیل نے کہا ہے کہ ’پیر سے درجہ حرارت میں نمایاں کمی ہوگی، موسم سرما کےلیے کپڑے تیار رکھیں۔‘

خلیحیہ چینل پر انٹرویو میں کہا کہ ’مملکت کے شمالی علاقوں میں ییر کی شام، منگل اور بدھ جمعرات کی صبح درجہ حرارت صفر ڈگری سینٹی گریڈ تک ہو سکتا ہے۔‘

’اگلے ہفتے ریاض میں کم سے کم درجہ حرارت 10 ڈگری سینٹی گریڈ کے قریب رہے گا۔‘