سعودی عرب کے کئی علاقے اتوار تک گرج چمک کے ساتھ بارش کی زد میں

سعودی محکمہ شہری دفاع نے اتوار تک مملکت کے مختلف علاقوں میں گرج چمک کے ساتھ بارش کی پیشگوئی کی ہے۔

ایس پی اے کے مطابق مکہ مکرمہ ریجن میں ہلکی سے درمیانے درجے کی بارش اور ژالہ باری کا امکان ہے۔ سیلابی صورتحال اور گرد آود ہوائیں چل سکتی ہیں جبکہ ریاض ریجن میں درمیانے درجے سے موسلا دھار بارش کا امکان ہے۔

عسیر اور جازان ریجن کے علاقے بھی  درمیانے درجے سے موسلادھار بارش کی زد میں ہوں گے۔ قصیم، الشرقیہ اور باحہ ریجن میں درمیانے درجے کی بارش کا امکان ظاہر کیا گیا ہے۔

مدینہ منورہ اور نجران ریجن کے علاقے بھی ہلکی بارش سے متاثر ہوں گے۔

محکمہ شہری دفاع نے شہریوں کو احتیاطی تدابیر اختیار کرنے کا مشورہ دیا اور کہا کہ’ خود کو محفوظ مقامات تک محدود رکھیں‘۔

’سیلاب والے مقامات، وادیوں اور نشیبی مقامات کے قریب نہ جائیں۔ ایسے مقامات پر جہاں پانی کا پانی جمع ہوجاتا ہے تیراکی سے گریز کیا جائے‘۔

شہری دفاع کا کہنا ہے ’بارش کے دوران سوشل میڈیا سمیت مختلف ذرائع ابلاغ کے توسط سے جاری کی جانے والی ہدایات کی پا بندی کی جائے‘۔