حلف برداری سے قبل یرغمالیوں کو رہا نہ کیا تو نتائج بھگتنا پڑیں گے، ٹرمپ کی وارننگ

امریکہ کے نومنتخب صدر ڈونلڈ ٹرمپ نے غزہ کے عسکریت پسندوں کو خبردار کیا ہے کہ اگر ان کے عہدہ سنبھالنے تک یرغمالیوں کو رہا نہ کیا گیا تو اس کے سخت نتائج بھگتنا پڑیں گے۔

فرانسیسی خبر رساں ادارے اے ایف پی کے مطابق یہ وارننگ سبکدوش ہونے والے صدر جو بائیڈن کی انتظامیہ کی جانب سے تمام تر سفارتی کوششوں کے بعد سامنے آئی ہے، جو اب تک کسی معاہدے کو حاصل کرنے میں ناکام رہی ہے۔

ڈونلڈ ٹرمپ نے کہا کہ یرغمالیوں کو 20 جنوری 2025 سے پہلے رہا کیا جائے۔

حماس نے 7 اکتوبر 2023 کو اسرائیل پر اب تک کا سب سے مہلک حملہ کیا۔ اسرائیل کے اعدادوشمار کے مطابق اس حملے کے نتیجے میں 1208 افراد ہلاک ہوئے، جن میں زیادہ تر عام شہری تھے۔

عسکریت پسندوں نے حملے کے دوران 251 یرغمالیوں کو پکڑ لیا، جن میں سے کچھ پہلے ہی ہلاک ہو چکے ہیں۔ ان میں سے 97 اب بھی غزہ میں قید ہیں جن میں سے فوج کے مطابق 35 ہلاک ہو چکے ہیں۔

اسرائیل کی انتقامی کارروائی میں غزہ میں 44 ہزار 429 افراد ہلاک ہو چکے ہیں۔