79 ہزار پاکستانی عازمینِ حج  کی درخواستیں منظور، چند ہزار نشستیں باقی: وزارت مذہبی امور

پاکستان کی وزارتِ مذہبی امور نے کہا ہے کہ 10 دسمبر تک حج کے لیے درخواستیں جمع کرانے والے 79 ہزار عازمین کو کامیاب قرار دیا گیا ہے۔

منگل کو وزارت مذہبی امور کے ترجمان نے بتایا کہ ایک ہفتے کی توسیع کے دوران 10 ہزار سے زائد نئی درخواستیں جمع ہوئیں۔

انہوں نے کہا کہ ’عازمینِ حج کے اصرار پر چند ہزار خالی  نشستوں پر پہلے آئیے پہلے پائیے کی بنیاد پر درخواستوں کی وصولی جاری رکھنے کا فیصلہ کیا گیا ہے۔ حج کوٹہ مکمل ہوتے ہی درخواستیں روکنے کا اعلان کیا جائے گا۔‘

بیان کے مطابق وزارتِ مذہبی امور نے نئے حج درخواست گزاروں کو ہدایت کی ہے کہ درخواست جمع کروانے کے بعد متعلقہ بینک سے کمپیوٹرائزڈ رسید ضرور حاصل کریں۔‘

کمپیوٹرائزڈرسید پر درج تاریخ اور وقت کے حساب سے فیصلہ کیا جائے گا۔

ترجمان نے یہ بھی کہا کہ سپانسرشپ حج سکیم بھی ’پہلے آئیے پہلے پائیے‘ کی بنیاد پر جاری رہے گی۔ سرکاری کوٹہ مکمل ہونے پر حج واجبات کی دوسری قسط کی تاریخ کا اعلان کیا جائے گا۔

’عازمینِ حج نئی ہدایات مثلاً بقیہ حج واجبات کا شیڈول، تربیت اور پروازوں کی اطلاع کے لیے اپنے سمارٹ فون پر ’پاک حج موبائل ایپ‘ کا استعمال لازمی کریں۔