سابق کرکٹر اقبال سکندر نے سعودی کرکٹ فیڈریشن کے جنرل منیجر کا چارچ سنبھال لیا

 پاکستان کے سابق کرکٹر اقبال سکندر نے سعودی عریبین کرکٹ فیڈریشن میں جنرل منیجر آف کرکٹ کا چارج سنبھال لیا ہے۔

 اس سے قبل سعودی کرکٹ فیڈریشن نے اقبال سکندر کو اس عہدے پر تعینات کرنے کا باضابطہ اعلان کیا تھا۔

فیڈریشن کا اقبال سکندر کے تقرر کے حوالے سے کہنا تھا کہ ’یہ تقرری سعودی عرب میں کرکٹ کی ترقی اور ایک اہم سپورٹس کے طور پر اس کی پوزیشن کو مضبوط بنانے کے لیے ہمارے عزم کو ظاہر کرتی ہے۔‘

اقبال سکندر نے پاکستان کی طرف سے چار ون ڈے انٹرنیشنل  کھیلے ہیں، وہ 1992 کے ورلڈ کپ کی فاتح ٹیم کا حصہ تھے۔

اردونیوز سے خصوصی گفتگو کرتے ہوئے سابق پاکستانی کرکٹر اقبال سکندر نے چارج سنبھالنے کی تصدیق کی اور کہا ’میری بنیادی ذمہ داریوں میں مملکت میں کرکٹ کو ڈیولپ کرنا، ایونٹ آرگنائز کرنا اور ایڈ منسٹریٹیو امور کو دیکھنا ہے۔‘

’ابھی چارج سنبھالا ہے، ہر شعبے کے بارے مں معلومات اور انہیں سمجھنے کی کوشش کر رہا ہوں، سعودی عرب میں کرکٹ کی ترقی کے بارے میں جلد ایک پلان سامنے لایا جائے گا اور اہداف طے کریں گے۔‘

ایک سوال پر انہوں نے کہا کہ ’سعودی عرب میں کرکٹ کا مستقبل روشن ہے اور میں یہاں بہت پوٹینشل دیکھ رہا ہوں۔‘

ان کا کہنا تھا ’مملکت میں کرکٹ دیکھنے اور کھیلنے والوں کی بڑی تعداد موجود ہے، ان میں بڑی تعداد ایشیائی تارکین کی ہے۔ کوشش ہو گی کہ سعودی نوجوانوں کو بھی اس جانب راغب کریں۔‘

انہوں نے اس امید کا اظہار کیا ’سعودی عرب جلد دنیائے کرکٹ میں اپنی شناخت بنائے گا اور بہت زیادہ آگے بڑھے گا۔‘

واضح رہے سعودی عرب میں کرکٹ کا کھیل خاص طور پر ایشیائی تارکین کے باعث پانچ دہائیوں سے زیادہ عرصے سے مقبول ہے۔

اس وقت دنیا بھر میں سب سے زیادہ دیکھے جانے والے کھیل فٹ بال کے بعد دوسرے نمبر پر کرکٹ ہے۔

اقبال سکندر لیگ بریک گوگلی بولر رہے، ڈومیسٹک اور بین الاقوامی کرکٹ میں حصہ لیا۔

 پاکستان کی قومی ٹیم کے علاوہ بہاولپور، حیدرآباد (پاکستان)، کراچی اور پاکستان انٹرنیشنل ایئرلائنزکی نمائندگی کی۔

سابق پاکستانی کرکٹر نے 189 فرسٹ کلاس میچز میں 658 وکٹیں لیں جبکہ 4 ہزار 204 رنز بنائے۔

 اقبال سکندر نے آئی سی سی اور ایشین کرکٹ کونسل کے ڈیولپمنٹ آفیسر کے طور پر کام کیا ہے۔ اس کردار میں افغانستان اور دیگر ملکوں میں کرکٹ کے قیام میں مدد کرنا شامل تھا۔

انہوں نے افغانستان اورعمان کی قومی کرکٹ ٹیموں کے کوچ کی حیثیت سے بھی کام کیا۔

2017  میں ایشیا کوالیفائر اور 2013 میں اے سی سی ٹی 20 چیمپیئن شپ کے لیے سعودی عرب کے قومی ٹیم کے کوچ رہے۔

پی ٹی وی اور سٹار سپورٹس کے سابق کمنیٹر اور آئی سی سی کے میچ ریفری رہ چکے ہیں۔