سری لنکا کی دو نابینا لڑکیاں سعودی وزارت کی میزبانی میں عمرہ کریں گی

سعودی وزیراسلامی امور شیخ ڈاکٹر عبداللطیف آل الشیخ نے سری لنکا کی دو نابینا لڑکیوں اور ان کے اہل خانہ کو وزارت کی میزبانی میں عمرہ ادا کرانے کی منظوری دی ہے۔

اخبار 24 کے مطابق سری لنکا میں متعین سعودی سفیر خالد القحطانی نے دونوں لڑکیوں اور ان کے اہل خانہ کو سفارتخانے میں مدعو کیا اور انہیں وزارت اسلامی امور کی میزبانی میں عمرہ کی ادائیگی کے خبردی گئی۔

لڑکیوں کی خواہش تھی کہ وہ عمرہ کی سعادت حاصل کریں مگر اسباب نہ ہونے کی وجہ سے ان کی یہ آرزو پوری نہ ہوسکی تھی۔

اس بارے میں سعودی سفیر کو جب علم ہوا تو انہوں نے وزارت اسلامی امور کو مطلع کیا۔

ایک نابینا لڑکی جو قرآن کریم کی حافظہ اورماہر قاریہ ہے نے بتایا ’ 13 برس کی عمر میں قرآن کریم حفظ کیا اورمختلف قاریوں کی طرز قرآت پر بھی عبور حاصل کیا۔‘

وزارت اسلامی امور کے تحت عالمی مقابلہ حسنِ قرات میں سری لنکا کی حافظہ نے پہلا انعام جیتا تھا جس پر انہیں 10 لاکھ سری لنکن روپیہ انعام میں دیا گیا تھا۔