ولی عہد سے شاہِ اردن کا رابطہ، فلسطین پرسعودی موقف کی حمایت

ولی عہد شہزادہ محمد بن سلمان بن عبدالعزیز آل سعود سے اردن کے شاہ عبداللہ الثانی بن حسین نے ٹیلی فون پر رابطہ کیا جس میں انہوں نے فلسطین کے حوالے سے مملکت کے واضح اور دوٹوک موقف کی تائید کی۔

سعودی خبررساں ایجنسی ’ایس پی اے‘ کے مطابق شاہ عبداللہ الثانی نے ولی عہد شہزادہ محمد بن سلمان سے ٹیلی فونک رابطے میں علاقائی اور خطے کی تازہ ترین صورتحال پر بھی تبادلہ خیال کیا۔

دریں اثنا العربیہ نیوز نے اردنی ایوان شاہی کی جانب سے جاری بیان کے حوالے سے کہا ہے کہ شاہِ اردن نے سعودی ولی عہد شہزادہ محمد بن سلمان کو ٹیلی فون کیا جس میں شاہ عبداللہ الثانی نے غزہ پٹی اور مغربی کنارے میں فلسطینیوں کو بے گھر کرنے کی ہر قسم کی کوششوں کو مسترد کیا۔

شاہِ اردن نے فلسطینی عوام کے جائز حقوق کے حصول اور غزہ میں جنگ بندی کو مستقل بنانے کے لیے عرب و بین الاقوامی کوششوں کو تیز کرنے پر بھی زور دیا۔

قبل ازیں سعودی وزارتِ خارجہ کی جانب سے جاری بیان میں فلسطینی خود مختار ریاست کے حوالے سے مملکت کے واضح موقف کا اعادہ کیا تھا جس میں کہا گیا تھا کہ مملکت اور اس کے رہنماؤں کا ہمیشہ سے یہی موقف رہا ہے کہ فلسطینوں کو ان کا جائز حق دیا جائے۔ 1967 کی سرحدوں کے مطابق آزاد و خود مختار فلسطینی ریاست کا قیام ہی مسئلے کا حل ہے۔